قلعہ دیدار سنگھ:اراضی تنازع پر فائرنگ ، ایک شخص قتل
قلعہ دیدار سنگھ(نامہ نگار )زمین کے تنازع پر دو گروپوں میں فائرنگ سے 3 بچوں کا باپ جاں بحق ،ایک شخص زخمی ہو گیا ۔
تھانہ قلعہ دیدار سنگھ کے علاقہ جیونا شریف کے رہائشی یوسف وڑائچ اور ساجد کے درمیان زمین کا تنازع چلا آرہا تھا،گزشتہ دنوں دونوں گروپوں کے درمیان تھانے میں ہاتھا پائی بھی ہوئی تھی ،سی پی او گوجرانوالہ نے نوٹس لیتے ہوئے ایک تھانیدار اور کانسٹیبل کو معطل بھی کیا تھا ،یوسف وڑائچ نے زمین خرید رکھی تھی جبکہ ملزم پارٹی فصل کٹائی کرنے نہیں دے رہی تھی۔ بتایا گیا ہے کہ یوسف گندم کی کٹائی کرنے کھیتوں میں پہنچا تو ساجد فاروق وغیرہ نے ڈنڈوں سے حملہ کردیا ،یوسف جان چھڑوا کر بھاگنے لگا تو ملزموں نے فائرنگ کردی جس کی زد میں آکر یوسف موقع پر ہی جا ں بحق ہوگیا،مقتول 3 بچوں کا باپ تھا۔واقعہ کی اطلاع پر پولیس موقع پر پہنچ گئی ، لاش تحویل میں لے کر پوسٹ مارٹم کیلئے بھیج دی گئی ۔ واقعہ کے بعد مخالف گروپ کے محسن کو بھی زخمی حالت میں ہسپتال لایا گیا پولیس نے معاملہ مشکوک جانتے ہوئے حراست میں لیکر علاج معالجہ کیلئے ڈی ایچ کیو گوجرانوالہ منتقل کردیا ۔ساجد فاروق، احمد فاروق، امیر حمزہ،رفعت پسران محمد اصغر ودیگر کیخلاف مقدمہ درج کر لیا گیا ۔ سی پی او گوجرانوالہ ایاز سلیم نے واقعہ کا نوٹس لیتے ہوئے دیگر ملزموں کی گرفتاری کا حکم دیدیا ۔
