چھت نہ بیٹھنے کی جگہ ،اندرون شہر بس سٹاپوں کی حالت زار
گوجرانوالہ (نیوز رپورٹر)گوجرانوالہ میں لوکل بسوں اور پبلک ٹرانسپورٹ کے انتظار میں مسافر سڑک پرکھڑے ہونے پر مجبور ،جہاں انتظار گاہ موجود ہے۔۔۔
وہاں سیٹیں ہی موجود نہیں ،بارش اور دھوپ میں شہری کھڑے ہونے پر مجبور ہیں۔ گوجرانوالہ میں اندرون شہر جی ٹی روڈ پر لوکل بسوں کا سٹاپ7مختلف مقامات پر ہوتا ہے ، اکثر سٹاپ پر تو سرے سے کوئی انتظار گاہ موجود نہیں اور جو ہیں وہ ناقابل استعمال ہیں جس کے باعث مسافروں کو سڑک پر کھڑے ہو کر بسوں کا انتظار کر نا پڑتا ہے ۔اکثر اوقات تیز بارش میں بھی کھڑا ہو کر انتظار کرنا پڑتا ہے ۔بزرگ ،بچے اور خواتین شدیدگرمی میں بغیر سائے کے کھڑے رہتے ہیں۔میونسپل کارپوریشن کی جانب سے خواتین اور بزرگ شہریوں کی سہولت کے لیے چند سٹاپس پر انتظار گاہوں کا انتظام کیا گیا تھا لیکن ان جگہوں پرکچرے کے ڈھیر نظر آنے لگے ، گوجرانوالہ جنرل بس سٹینڈ کے باہر قائم بس سٹاپ پر تجاوزات قائم ہیں خواتین کے بیٹھنے کی جگہ پر لوگ سوئے ہوتے ہیں۔شہریوں کا کہنا ہے کہ جی ٹی روڈ پر لوکل بس سٹاپس کی حالت زار کو بہتر بنایا جائے اور ان کے لیے انتظار گاہ کا بھی بندوبست کیا جائے تاکہ بس کے انتظار میں انہیں مشکلات کا سامنا نہ کرنا پڑے ۔
