فٹ پاتھوں پر تجاوزات کی بھر مار ، پیدل چلنا مشکل
گوجرانوالہ (نیوز رپورٹر)گوجرانوالہ میں پیدل چلنے والوں کے لیے بنائے جانے والے فٹ پاتھ پر تجاوزات قائم ہو چکی ہیں۔جبکہ گاڑیاں فٹ پاتھ پر کھڑی ہونے کی وجہ سے پیدل چلنے والوں کے لیے راستے سکڑ ۔
میونسپل کارپوریشن کی جانب سے فٹ پاتھ پر قائم پتھارے داروں کے خلاف آپریشن کیا گیا تھا لیکن اب دوبارہ تجاوزات قائم ہو چکی ہیں۔تفصیلات کے مطابق جی ٹی روڈ سمیت گوجرانوالہ کی تمام اہم سڑکوں کے کنارے فٹ پاتھ پر خوانچہ فروشوں نے عرصہ داراز سے ٹھیلے سجا رکھے ہیں۔جس کی وجہ سے پیدل چلنے والوں کے لیے راستہ ختم ہو گیا ہے ، پیدل چلنے والوں کوفٹ پاتھ کی بجائے سڑک کا استعمال کر نا پڑتاہے ۔فٹ پاتھوں پر قابض پتھارے داروں نے ٹھیلے سجا رکھیں ہیں۔میونسپل، کارپوریشن کی جانب سے فٹ پاتھ پر قائم تجاوزات کے خلاف آپریشن کیا گیا تھا لیکن اب دوبارہ سے تجاوزات قائم ہو چکی ہیں۔اس کے علاوہ جی ٹی روڈ پر گوندلانوالہ چوک، سیالکوٹی دروازے ، ریل بازار، پسرور روڈ،شیرانوالہ باغ کے علاقوں میں فٹ پاتھ پر گاڑیاں بھی کھڑی کردی جاتی ہیں جوکہ دن بھر وہاں کھڑی رہتی ہیں۔ان گاڑیوں کی وجہ سے لوگوں کو پیدل چلنے میں مشکلات کا سامنا ہے اور پیدل چلنے والے راہگیروں کے ساتھ حادثات بھی بڑھ گئے ہیں ،پیدل چلنے والے شہری فٹ پاتھ پر جگہ نہ ہونے کی وجہ سے سڑک کا استعمال کرتے ہیں جس کی وجہ سے حادثات ہوتے ہیں۔جن جگہوں پر فٹ پاتھ نہیں ہیں وہ گاڑیاں اور رکشوں کی پارکنگ ہوتی ہے ۔اکثر جگہوں پر ٹریفک پولیس کی جانب سے نو پارکنگ کا سائن بورڈ بھی آویزاں ہے لیکن اس کے باجود وہاں گاڑیاں کھڑی ہوتی ہیں ،شہریوں کا کہنا تھا کہ فٹ پاتھ سڑک کے کنارے پیدل چلنے والوں کے لیے بنائے جاتے ہیں ،لیکن یہاں پر فٹ پاتھ پر پتھارے داروں کا قبضہ ہے جس کی وجہ سے بزرگ ،خواتین اور بچے فٹ پاتھ کی بجائے سڑک سے گزرتے ہیں اورحادثات کا شکار ہوتے ہیں۔جبکہ صبح سے لے کر شام تک گاڑیاں کھڑی رہتی ہیں جس کی وجہ سے انہیں مشکلات کا سامنا ہے ۔ٹریفک پولیس اور انتظامیہ کو چاہیے کہ سڑک کنارے فٹ پاتھ پر سجے ان ٹھیلوں کو فوری ختم کیا جائے اور گاڑیاں کھڑی کرنے والوں کے خلاف کارروائی کی جائے تاکہ پیدل چلنے والے آسانی سے سڑک پار کر سکیں۔
