بلدیاتی اداروں اور محکموں کے بجٹ،فنڈز اور اخراجات کی جانچ پڑتال کا آغاز
گوجرانوالہ (سٹی رپورٹر)ڈویژن میں پنجاب حکومت کی زیر نگرانی قائم 42 سرکاری محکموں کے گزشتہ مالی سال کے سالانہ آڈٹ کا آغاز کردیاگیا۔
آڈٹ کیلئے ٹیمیں تشکیل دے دیں جو گوجرانوالہ پہنچ گئیں اور بیشتر سرکاری اداروں کا ریکارڈ تحویل میں لے کر چھان بین شروع کردی، سالانہ تعمیرو مرمت ،ترقیاتی کاموں ،خریداری کی مد میں خرچ ہونے والے اربوں روپے فنڈز کاآڈٹ کیا جائے گا ۔قواعد وضوابط کے برعکس فنڈز کے استعمال اور بلوں کی ادائیگی پر آڈٹ پیرا جات لگائے جائیں گے ۔ ہیلتھ اتھارٹی ،ایجوکیشن اتھارٹی ،ہائی ویز ،محکمہ بلڈنگ ،واسا ،جی ڈی اے ،ڈی ایچ کیو ہسپتال ،میڈیکل کالج ،سوشل سکیورٹی ہسپتال ،میونسپل کارپوریشن ،محکمہ بہبود آبادی ،لائیوسٹاک،بلدیاتی اداروں اور دیگر اداروں کے بجٹ ،فنڈز اور اخراجات کا آڈٹ شروع کردیا گیا ہے ۔ ذرائع کے مطابق آڈٹ کے دوران بے ضابطگیوں پر آڈٹ پیرا لگائے جائیں گے اور بے ضابطگیوں میں ملوث افسر وں ،ملازمین کے خلاف کاروائی کی سفارش کی جائے گی ، ترقیاتی منصوبہ جات کے ٹینڈرز ،پیپرا رولز اور شفافیت کا بھی جائزہ لیا جائے گا۔
