سیالکوٹ:شہری پر تشدد ، ڈی پی او کا نوٹس ، 2 ملزم گرفتار
سیالکوٹ (نمائندہ دنیا ، ڈسٹرکٹ رپورٹر)شہری پر تشدد کا واقعہ ،ڈی پی او فیصل شہزاد کا نوٹس، ملزم گرفتار کرلئے گئے ۔
تھانہ اگوکی کے علاقہ فتح گڑھ میں مقامی جم میں موبائل فون چوری کے شبہ پر مہر عامر نامی جم انسٹرکٹر نے دو ساتھیوں کے ہمراہ ایک شہری کو ٹانگوں اور بازؤں سے پکڑ کر بہیمانہ تشدد کا نشانہ بنایا تھا۔ واقعہ کی ویڈیو منظر عام پر آتے ہی ڈی پی او فیصل شہزاد نے نوٹس لیتے ہوئے ایس ایچ او تھانہ اگوکی نعمان بٹر کو فوری قانونی کارروائی کے احکامات جاری کیے ۔پولیس نے بروقت کارروائی کرتے ہوئے واقعہ کا مقدمہ درج کر کے تشدد میں ملوث مرکزی ملزم مہر عامر اور ساتھی مہر سبحان قیصر کو گرفتار کر لیا جبکہ تیسرے ملزم کی گرفتاری کیلئے چھاپے مارے جا رہے ہیں۔ڈی پی او فیصل شہزاد کا کہنا ہے کہ کسی کو بھی ذاتی طور پر سزا دینے یا قانون ہاتھ میں لینے کی ہرگز اجازت نہیں دی جا سکتی،مہذب معاشروں میں ایسے طرزِ عمل کی کوئی گنجائش نہیں، شہریوں کی عزتِ نفس اور قانونی تحفظ کو یقینی بنانا پولیس کی اولین ترجیح ہے ۔انہوں نے مزید کہا کہ واقعے کی مکمل تحقیقات جاری ہیں اور انصاف کے تمام تقاضے پورے کیے جائیں گے ۔
