ڈولفن سکواڈ اور پیٹرولنگ افسر گشت موثر بنائیں:آئی جی
اسلام آباد(خصوصی رپورٹر)انسپکٹر جنرل پولیس اسلام آباد سید علی ناصر رضوی کا زونل سپرنٹنڈنٹس کے ساتھ اہم اجلاس، وفاقی دارالحکومت میں امن و امان اور جرائم کی صورتحال کے ساتھ ساتھ زونل ایس پیز کی کارکردگی کا جائزہ لیا۔
آئی جی نے ہدایت کی کہ اپنے اپنے علاقہ میںامن و امان کی صورتحال ،جرائم پیشہ عناصر کے انسداد اور عوام الناس کی جان و مال محفوظ بنانے کیلئے موثر اقدامات کریں۔ ڈولفن سکواڈ اور پیٹرولنگ افسر گشت موثر بنائیں۔ تمام افسران جرائم پیشہ عناصر کے خلاف جاری کریک ڈاؤن مزید تیز کریں اور ان کی گرفتاری یقینی بنانے کے ساتھ انہیں قرار واقعی سزا دلائیں۔ اے آئی جی اسٹیبلیشمنٹ ،آپریشنز، ہیڈکوارٹرز اور ایڈمن برانچز کے افسران کے ساتھ میٹنگ میں آئی جی نے بھرتی کا عمل شفافیت کے ساتھ میرٹ پر مکمل کرنے اور انٹرویوز جلد مکمل کرنے کی ہدایات جاری کیں۔ علاوہ ازیں آئی جی علی ناصر نے کھلی کچہری کا انعقاد کیا اور شہریوں و پولیس افسروں کے مسائل سنے اور حل کیلئے موقع پر ہدایات جاری کیں۔
