وزیر صحت کا ایمرجنسی آپریشن سینٹر کا دورہ، پولیو مہم پر بریفنگ
اسلام آباد (نیوز رپورٹر) وفاقی وزیر قومی صحت سید مصطفیٰ کمال نے صوبائی ایمرجنسی آپریشن سینٹر کا دورہ کیا ہے، صوبائی کوآرڈینیٹر ارشاد علی سوڈھر نے وزیر قومی صحت کو پولیو کی موجودہ صورتحال، انسداد پولیو مہم اور درپیش چیلنجز پر بھی بریفنگ دی۔
وفاقی وزیر قومی صحت نے ویکسین سے انکاری خاندانوں کی رپورٹ طلب کر لی، سید مصطفی کمال رواں سال کے 6میں سے 4پولیو کیسز سندھ سے ہونے پر تشویش کا اظہار کیا۔ سندھ میں 43ہزار والدین ویکسینیشن سے انکاری ہیں جن میں سے تقریباً 42ہزار کراچی سے ہیں۔ انہوںنے کہاوالدین اپریل کی قومی پولیو مہم میں بچوں کو پولیو کے قطرے ضرور پلائیں، والدین کی مدد سے ملک کو پولیو سے پاک کرنا ہے۔ کراچی کے سیوریج کے نمونوں میں پولیو وائرس کی مسلسل موجودگی پر تشویش ہے، مصطفی کمال نے کہا سندھ سے پولیو کے خاتمے کیلئے موثر اقدامات یقینی بنارہے ہیں۔ انسداد پولیو کوآرڈینیٹر ارشاد علی نے کہا کراچی کے تمام سٹیک ہولڈرز کے ساتھ مل کر ایسی حکمت عملی تیار کی جا رہی ہے تاکہ کوئی بچہ ویکسین سے محروم نہ رہے۔
