سویپنگ، فوگنگ، ڈینگی سرویلنس کا عمل یقینی بنائیں ،ڈ ی سی راولپنڈی
راولپنڈی(نیوزرپورٹر)ڈپٹی کمشنر راولپنڈی ڈاکٹر حسن وقار چیمہ نے ہدایت کی ہے کہ شہر بھر کی تمام یونین کونسلز میں سویپنگ، فوگنگ اور ڈینگی سرویلنس کے عمل کو باقاعدگی اور تسلسل سے یقینی بنایا جائے ،کل سے انسدادِ ڈینگی اقدامات کا روزانہ جائزہ لینے کے لیے رات کو بھی ڈسٹرکٹ ایمرجنسی ر سپانس کمیٹی کا اجلاس کمیٹی روم میں منعقد ہوگا۔
ڈپٹی کمشنر نے یہ ہدایات اپنے دفتر میں روزانہ کی بنیاد پر منعقدہ انسدادِ ڈینگی اجلاس کی صدارت کے دوران دیں۔ انہوں نے بعض علاقوں میں سویپنگ میں غفلت پر متعلقہ ایریاز کے ڈی ڈی ایچ اوز کو شوکاز نوٹسز بھی جاری کرنے کی ہدایت کی۔ ڈپٹی کمشنر نے کہا ایس او پیز کی خلاف ورزی کرنے والے افسران کے خلاف کارروائی عمل میں لائی جائے اور ضرورت پڑنے پر ان کے دفاتر کو سیل کیا جائے ۔ڈپٹی کمشنر نے مزید ہدایت کی کہ انسدادِ ڈینگی کی کارکردگی کو ہر ہفتے میڈیا کے ذریعے عوام کے سامنے لایا جائے ۔
