راولپنڈی بورڈ، امتحان انٹر میڈیٹ سالانہ کے نتائج کا اعلان
19,782امیدواران میں سے 6,311کامیاب، 13ہزار سے زائد فیل
راولپنڈی (خصوصی نامہ نگار) تعلیمی بورڈ راولپنڈی نے امتحان انٹرمیڈیٹ دوسرا سالانہ 2025کے نتائج کا اعلان کر دیا ہے۔ مجموعی طور پر 19,992امیدواران نے داخلہ جمع کرایا، جن میں سے 19,782امیدواران امتحان میں شریک ہوئے۔ ان میں 6,311امیدوار کامیاب قرار پائے، جس کے نتیجے میں کامیابی کا تناسب 31.9فیصد رہا، 13,414امیدوار ناکام رہے۔ مزید برآں 201امیدوار امتحان میں غیر حاضر رہے جبکہ 9داخلہ فارم مختلف وجوہات کی بنیاد پر منسوخ کیے گئے، نتائج کے موقع پر کمشنر و چیئرمین تعلیمی بورڈ راولپنڈی عامر خٹک نے کہا کہ امتحانات میں میرٹ اور شفافیت پر کسی قسم کا کوئی سمجھوتہ نہیں کیا جائے گا۔ شفاف، منصفانہ اور غیر جانبدار امتحانی نظام کا قیام ان کی اولین ترجیح ہے۔ جدید تقاضوں کو مدنظر رکھتے ہوئے آئندہ امتحان میٹرک پہلا سالانہ 2026کو زیرو ٹالرینس پالیسی کے تحت منعقد کروایا جائے گا تاکہ نقل اور دیگر بے ضابطگیوں کا مکمل خاتمہ یقینی بنایا جاسکے۔
