جامعہ کراچی ، سیدنا مفضل سیف الدین اسکول آف لاء کا افتتاح
کراچی (اسٹاف رپورٹر)جامعہ کراچی میں سیدنا مفضل سیف الدین بلڈنگ اسکول آف لاء کی عمارت کا افتتاح کردیا گیا۔عمارت کو تین سال میں 60 کروڑ روپے کی لاگت سے مکمل کیا گیا ہے۔
اس موقع پر منعقدہ تقریب میں بوہرہ کمیونٹی کے روحانی پیشوا سیدنا مفضل سیف الدین خصوصی طور پر شریک ہوئے جبکہ گورنر سندھ کامران خان ٹیسوری، وزیر اعلیٰ سندھ جسٹس (ر) مقبول باقر ،سابق وزیر اعلی سندھ مراد علی شاہ، میئر کراچی مرتضی وہاب اور جامعہ کراچی کے وائس چانسلر پروفیسر ڈاکٹر خالد عراقی سمیت دیگر شریک ہوئے ۔ نگراں وزیر اعلیٰ سندھ نے کہا کہ بوہرہ کمیونٹی کی سوشل سروس میں خدمات ڈھکی چھپی نہیں، جامعہ کراچی میں اس عمارت کی تعمیر بھی اسی سلسلے کی ایک کڑی ہے ، یہ ایک اسٹیٹ آف دی آرٹ سہولت ہے جو جامعہ کراچی کو دی گئی ہے ، امید ہے کہ یہ عمارت ہمارے طالبعلموں کو جدید اور اعلیٰ تعلیم میں سہولیات فراہم کرے گی۔ گورنر سندھ کامران خان ٹیسوری نے کہا کہ ڈاکٹر سیدنا مفضل سیف الدین کا پاکستان آنا ہی ہمارے لیے اعزاز کی بات ہے ، ان سے گزشتہ دورے کے موقع پر درخواست کی تھی کہ آپ کراچی میں ایک اعلی پائے کی یونیورسٹی قائم کرائیں، اس گزارش کے بعد تین ماہ کے اندر ہی اس یونیورسٹی کا چارٹر منظور ہوگیا تھا ۔شیخ الجامعہ ڈاکٹر خالد عراقی نے کہا کہ بوہرہ کمیونٹی نے ویلفیئر ،صحت اور تعلیم کیلئے ہمیشہ کام کیا۔
