سانحہ طاہر پلازہ میں ملزم فیصل عرف ماما کی ضمانت منظور
کراچی (اسٹاف رپورٹر)سندھ ہائیکورٹ نے سانحہ طاہر پلازہ میں ملزم فیصل عرف ماما کی ضمانت منظور کرتے ہوئے ملزم کو تین لاکھ روپے کے مچلکے جمع کرانے کا حکم دے دیا۔
منگل کو سندھ ہائیکورٹ میں سانحہ طاہر پلازہ کیس میں اہم پیش رفت ہوئی۔ملزم کے وکیل اشعر قریشی نے موقف اختیار کرتے ہوئے کہا کہ ملزم فیصل عرف ماما 2016 سے جیل میں ہے اور ملزم کی سانحہ طاہر پلازہ کیس میں 2021 میں گرفتاری ظاہر کی گئی ہے ۔ملزم کے خلاف کوئی شواہد نہیں ہیں اور پراسیکیوشن صرف کیس کو طول دے رہی ہے ۔پراسیکیوشن نے موقف اختیارکیا کہ ملزمان کے خلاف 2008 میں رسالہ تھانے میں مقدمہ درج کیا گیا ہے ۔ کیس تاحال انسداد دہشتگردی عدالت میں زیر التوا ہے۔ عدالت نے ملزم کی ضمانت منظور کرتے ہوئے ملزم کو تین لاکھ روپے کے مچلکے جمع کرانے کا حکم دیا۔
روزنامہ دنیا ایپ انسٹال کریں
