ڈکیتی کی متعددوارداتوں میں مطلوب 2ملزمان گرفتار
کراچی(اسٹاف رپورٹر)پاکستان رینجرز (سندھ)اور پولیس نے انٹیلی جنس معلومات کی بنیاد پر کراچی کے علاقے سکندر گوٹھ گلزار ہجری میں مشترکہ کارروائی کرتے ہوئے ڈکیتی اور اسٹریٹ کرائمز کی متعدد وارداتوں میں ملوث مطلوب 2 ملزمان یاسر عرف منا عرف علی اور محمد علی عرف بڑا کو گرفتار کرکے ان کے قبضے سے ایک عدد رکشہ بھی برآمد کر لیا گیا۔
تفصیلات کے مطابق پاکستان رینجرز (سندھ) اور پولیس کی جانب سے 12 اپریل 2024 کوگلشن چورنگی پردوران ڈکیتی مزاحمت پر قتل ہونے شہری تراب حسین زیدی اور پورٹ قاسم پر سیکیورٹی گارڈکے قاتلوں کی گرفتاری کے لیے ایک مشترکہ خصوصی ٹیم تشکیل دی گئی۔جس نے قتل میں ملوث منا گینگ کے 2 ملزمان یاسر عرف منا عرف علی اور محمد علی عرف بڑا کو کراچی کے علاقے سکندر گوٹھ گلزار ہجری سے گرفتار کر لیا۔ابتدائی تفتیش کے دوران ملزم یاسر عرف منا عرف علی نے انکشاف کیا کہ وہ اور اس کے دیگر ساتھی کامران عرف کامو اور عمران عرف گلابی تراب حسین زیدی کے قتل میں ملوث ہیں۔ملزم کے ساتھی کامران عرف کامو اور عمران عرف گلابی قتل کی واردات کے بعد گرفتاری سے بچنے کے لیے پنجاب فرار ہو گئے تھے ۔ملزم محمد علی عرف بڑا نے دوران تفتیش انکشاف کیا کہ ماہ رمضان میں اپنے دیگر ساتھیوں بابر، جمیل، عمران اور محمد نویدکے ہمراہ پورٹ قاسم پر قائم آئل فیکٹری میں ڈکیتی کی واردات کی کوشش کی۔ مزاحمت پر ملزمان نے سیکورٹی گارڈ کو فائرنگ کر کے قتل کر دیاتھا۔
