شہری کو 50 لاکھ بھتے کی کال،پولیس کا درخواست لینے سے انکار
کراچی(اسٹاف رپورٹر) گلشن اقبال بلاک 7 میں شہری کو مبینہ طور پر 50 لاکھ بھتے کی کال موصول ہوئی ہے ، پولیس نے درخواست وصول کرنے سے انکار کردیا۔
تفصیلات کے مطابق کراچی کے علاقے گلشن اقبال بلاک 7 میں عمیر نامی شہری کو مبینہ طور پر 50لاکھ روپے بھتے کی کال موصول ہوئی ہے ، متاثرہ شہری عمیر نے بتایا کہ کال کرنیوالے نے جان سے مارنے کی بھی دھمکی دی ہے ۔متاثرہ شہری عمیر نے ویڈیو بیان میں کہا کہ ہفتے کی صبح بھتہ طلبی کی درخواست جمع کرانے گلشن تھانے گیا، تھانہ گلشن اقبال ایس ایچ او نے درخواست وصولی سے انکار کردیا۔ شہری عمیر نے بتایا کہ ہفتے اور اتوار کی درمیانی شب پولیس اہلکار میرے گھر پر آگئے ، پولیس موبائل اور 2 پرائیویٹ گاڑیوں میں اہلکار گھر پر آئے جس میں سے 3 سے 4 اہلکار وردی میں جبکہ دیگر افراد سادہ لباس میں تھے ۔شہری عمیر سکندر نے کہا کہ اہلکاروں کے ساتھ ایک خاتون بھی تھی، پولیس اہلکاروں نے گھر کا دروازہ بجایا اور دیوار پر چڑھ گئے ، پولیس اہلکار مجھے گالیاں بھی دیتے رہے اس واقعے کے دوران میں اپنے گھر میں بیوی اور 2 بیٹیوں کے ہمراہ موجود تھا۔عمیر سکندر نے کہا کہ اہلکاروں نے سی سی ٹی وی کیمروں کا رخ بھی موڑ دیا، میں اور اہلیہ گھر کی چھت سے اہلکاروں کی ویڈیو بناتے رہے ، جب مددگار 15 پر کال کی اور 15 کی موبائل پہنچنی تو اہلکار وہاں سے چلے گئے ۔عمیر سکندر نے کہا کہ شبہ ہے کہ ان تمام معاملات کے پیچھے میرے والد اور بھائی کا ہاتھ ہے ، میرے والد اور بھائی جعلی ادویات کی خرید و فروخت کا کام کرتے ہیں، میں نے والد اور بھائی سے لاتعلقی کی ہوئی ہے، مجھ سمیت فیملی کو جان کا خطرہ ہے ۔عمیر سکندر نے مطالبہ کیا کہ مجھے اور میری فیملی کو تحفظ فراہم کیا جائے ، دوسری جانب پولیس کا کہنا ہے کہ گزشتہ شام ذاتی نوعیت کے جھگڑے پر ایف آئی آر ہوئی تھی، انویسٹی گیشن کی ٹیم چھاپہ مارنے گئی تھی۔پولیس حکام نے اس حوالے سے مزید کہا کہ اس کارروائی کا ریکارڈ موجود ہے روز نامچہ میں انٹری بھی ہے اور یہ واقعہ بھتے کا شاخسانہ نہیں اس لیے مزید تفتیش کررہے ہیں۔
