مختلف مقامات پر ایک ہی دن آتشزدگی کے 4 واقعات
کراچی (آن لائن)شہر قائد کے مختلف علاقوں میں ایک ہی دن میں آتش زدگی کے 4 واقعات پیش آئے ، تاہم کوئی جانی نقصان رپورٹ نہیں ہوا۔
تفصیلات کے مطابق آگ لگنے کے واقعات مکان، شادی ہال ، جھگیوں اور دکان میں پیش آئے جن میں 2 جھگیوں سمیت مختلف نوعیت کا سامان جل گیا۔کے ایم سی فائر بربگیڈ حکام کے مطابق گورنگی نمبر 4 گھاس منڈی کے قریب ایک مکان میں آگ لگنے کی اطلاع پر فائر بریگیڈ کی گاڑی روانہ ہوئی جس نے جائے وقوع پر پہنچ کر آگ بجھائی۔ واقعے میں مکان کے ایک کمرے میں آگ لگنے سے گھریلو سامان جل گیا۔دوسری جانب کورنگی نمبر 5 میں جھگیوں میں آگ لگنے کی اطلاع پر فائر بریگیڈ کی گاڑی نے جائے وقوع پر پہنچ کر آگ بجھائی۔ اس واقعے میں 2 جھگیوں کو نقصان پہنچا، تاہم کوئی جانی نقصان نہیں ہوا۔علاوہ ازیں شاہ فیصل کے علاقے گرین ٹاؤن میں ایک شادی ہال میں آگ لگنے سے کرسیاں اور دیگر سامان جل گیا۔ اطلاع ملنے پر فائر بریگیڈ اہل کاروں نے جائے وقوع پرپہنچ کر کارروائی کی۔ واقعے میں کوئی جانی نقسان رپورٹ نہیں ہوا۔اْدھر ایم اے جناح روڈ پر تاج کمپلیکس کے عقبی حصے میں واقع اے سی کی دکان میں آگ گئی، جس کی اطلاع ملنے پر فائر بریگیڈ کی گاڑی نے پہنچ کر آگ بجھائی اور اطراف کی دکانوں کو آتش زدگی سے بچایا۔ واقعے میں دکان میں موجود سامان جل گیا، تاہم تاہم کوئی جانی نقصان نہیں ہوا۔
