شفاف مالیاتی نظام ہی ملک کی ترقی کا ضامن ، گورنر
کراچی(این این آئی)گورنر سندھ کامران خان ٹیسوری نے کہا ہے کہ جدید معیشت میں اکاؤنٹنگ اور فنانس کا کردار بنیادی اہمیت رکھتا ہے ، ایک مضبوط اور شفاف مالیاتی نظام ہی کسی بھی ملک کی ترقی کی ضمانت ہوتا ہے ۔۔
ہمارا ملک ایک ابھرتی ہوئی معیشت ہے جہاں نوجوانوں کے لئے بے شمار مواقع موجود ہیں۔ان خیالات کا اظہار گورنر سندھ نے ایسوسی ایشن آف چارٹرڈ سرٹیفائیڈ اکاؤنٹس (اے سی سی اے ) کی تقریب حلف برداری سے بحیثیت مہمان خصوصی خطاب کے دوران کیا۔ قبل ازیں اے سی سی اے کی پہلی خاتون نومنتخب صدر عائلہ ماجد نے گورنرسندھ کا پرتپاک استقبال کیا۔ گورنر سندھ نے اے سی سی اے کے نئے ممبران کو مبارک باد پیش کرتے ہوئے کہا کہ یہ کامیابی آپ کی جدوجہد کا نتیجہ ہے اور آپ کے روشن مستقبل کی علامت ہے ، آج یہ تقریب معاشی ترقی کے لئے بھی ایک اہم سنگ میل ثابت ہوگی، گورنر سندھ نے مزید کہا کہ اے سی سی اے دنیا بھر میں پیشہ ورانہ اکاؤنٹنگ اور فنانس کے شعبہ میں مہارت کا ضامن ہے ، یہ با عثِ فخر ہے کہ ہمارے نوجوان عالمی سطح پر اس پیشہ میں نمایاں مقام حاصل کر رہے ہیں۔ عصر حاضر میں مصنوعی ذہانت کو اکاؤنٹنگ اور فنانس کے ہر پہلو میں ضم کرناہوگا، آج گورنر ہاؤس میں 50 ہزار نوجوان آئی ٹی کورسز کر رہے ہیں، آئی ٹی کورسز کرنے والے نوجوان 2000 ڈالرز ماہانہ کما رہے ہیں، انہوں نے مزید کہا کہ گورنر ہاؤس میں اب تک ساڑھے آٹھ لاکھ مستحقین میں راشن بیگز تقسیم کر چکے ہیں۔
