برطانوی بزنس مینوں کوسندھ میں سرمایہ کاری کی دعوت
کراچی (اسٹاف رپورٹر)سندھ کے سینئر وزیر شرجیل انعام میمن سے برطانوی ڈپٹی ہائی کمشنر لانس ڈوم نے کراچی میں ملاقات کی۔
ملاقات میں حکومت سندھ کے اقتصادی منصوبوں، ملکی سیاسی حالات اور دیگر اہم امور پر تفصیلی گفتگو کی گئی اور سندھ میں جاری ترقیاتی کاموں، عوامی فلاحی مجوزہ منصوبوں اور برطانیہ کے ساتھ تعاون کے فروغ پر تبادلہ خیال کیا گیا۔برطانوی ڈپٹی ہائی کمشنرسے گفتگو کرتے ہوئے شرجیل میمن نے برطانوی سرمایہ کاروں سے سندھ میں سرمایہ کاری پر زور دیتے ہوئے کہا کہ سندھ کے تم شعبوں میں سرمایہ کاری کے لئے بہت مواقع ہیں،ہم چاہتے ہیں کہ برطانوی سرمایہ کار سندھ میں سرمایہ کاری کریں۔ انہوں نے کہا کہ صوبے میں صحت کے شعبے میں شاندار کام ہو رہا ہے این آئی سی وی ڈی اور سائبر نائف جیسے جدید طبی مراکز عالمی معیار کی سہولیات فراہم کر رہے ہیں۔انہوں نے کہا کہ سندھ میں دنیا کا سب سے بڑا ہاؤسنگ منصوبہ جاری ہے ، جس کے تحت 21 لاکھ مکانات سیلاب متاثرین کے لیے تعمیر کیے جا رہے ہیں، ہاؤسنگ منصوبے کا مقصد قدرتی آفات سے متاثرہ افراد کو محفوظ رہائش فراہم کرنا اور ان کی زندگیوں کو دوبارہ مستحکم کرنا ہے ۔برطانوی ڈپٹی ہائی کمشنر لانس ڈوم نے حکومت سندھ کے کاوشوں اور ترقیاتی منصوبوں کی تعریف کی اور کہا کہ صوبے میں عوامی فلاح و بہبود کے لیے جو کام ہو رہا ہے ، وہ قابل ستائش ہے ۔
