گرانفروشی عروج پر، حکومتی دعوے بیانات تک محدود،مبشر حسن
کراچی (اسٹاف رپورٹر)مجلس وحدت مسلمین پاکستان صوبہ سندھ کراچی ڈویژن کے پولٹیکل سیکرٹری علامہ مبشر حسن نے کہا ہے کہ رمضان المبارک کے دوران گراں فروشی پر قابو پانے کے حکومتی دعوے محض اخباری بیان ثابت ہوئے ہیں۔
اشیائے خور و نوش اور پھلوں کی آسمان سے باتیں کرتی ہوئی قیمتوں نے عام آدمی کو مشکلات میں جھکڑ ا ہوا ہے ۔ضلعی انتظامیہ نے عوام کو لوٹنے کیلئے گراں فروشوں کوکھلی چھوٹ دے رکھی ہے ۔ رمضان المبارک کے تقدس کے پیش نظر غیر مسلم ممالک اشیائے خورو نوش کے نرخوں میں نمایاں کمی کرتے ہیں لیکن ہمارے ہاں معاملات الٹ ہے ۔ ان خیالات کا اظہار انہوں نے سوشل میڈیا کی ٹیم سے افطار کے موقع پر کیا۔ان کا مزید کہنا تھا رمضان المبارک کے دوران ملک کے تمام شہروں میں پرائس مجسٹریٹ بازاروں کا دورہ کریں اور چیزوں کی کوالٹی اور قیمتوں کا جائزہ لیا جائے ،گراں فروشوں کو جگہ پر جرمانے کیے جائیں تو عوام کومہنگائی کی اس اذیت سے نجات مل سکتی ہے ۔ ذخیرہ اندوزوں کا بھی محاسبہ ہونا چاہیے جو خود ساختہ مہنگائی کا باعث بنتے ہیں۔ضلعی انتظامیہ کی دانستہ غفلت ناجائز منافع خوروں کے حوصلوں میں اضافے کا باعث بنتی ہے ۔اگر ادارے اپنی ذمہ داریاں احسن طریقے سے سرانجام دیں تو پھر طے شدہ نرخوں سے زائد قیمت پر خریدو فروخت کی کسی کو جرات نہیں ہو گی۔
