سندھ ہائیکورٹ کامعذور ٹیچر کو بحال کرنے کا حکم
کراچی (اسٹاف رپورٹر)سندھ ہائی کورٹ نے ضلع جامشورو میں معذور ٹیچر کی بھرتی کی منسوخی کے خلاف درخواست پر معذور ٹیچر کو بحال کرنے کا حکم دے دیا ۔
عدالت نے درخواست گزار کو تنخواہوں سمیت دیگر واجبات ادا کرنے کا حکم بھی دے دیا ہے ۔ درخواست گزار کے وکیل کی جانب سے موقف اختیار کیاگیاکہ درخواست گزار شاہنواز کھوسو معذور کوٹے پر جونیئر ایلیمنٹری اسکول ٹیچر بھرتی ہوا تھا، محکمہ تعلیم نے عدالتی حکم کو بنیاد بنا کر درخواست گزار کی بھرتی منسوخ کی، سندھ ہائی کورٹ نے اساتذہ بھرتیوں کے ٹیسٹ میں چالیس فیصد سے کم نمبر حاصل کرنے والے امیدواروں کی بھرتی معطل کی تھی، درخواست گزار ہارڈ ایریا کی بنیاد پر نہیں معذور کوٹے پر بھرتی ہوا تھا۔ سرکاری وکیل کی جانب سے مؤقف اختیار کیاگیا کہ سندھ حکومت نے ریکروٹمنٹ پالیسی 2021 میں کم از کم 55 نمبرز کی شرط عائد کی تھی، بعد میں ترمیم کرکے 33 نمبرز کئے گئے ، عدالتی حکم پر بھرتی کے لئے امتحان میں کم از کم چالیس فیصد کی پالیسی بنائی گئی۔ عدالت نے ریمارکس میں کہاکہ معذور افراد کے لئے دنیا بہت سخت اور ظالم ہوسکتی ہے ، معذور افراد کو سماجی طور پر امتیازی سلوک کا سامنا کرنا پڑتا ہے ،سوشل ویلفیئر ڈپارٹمنٹ نے درخواست گزار کو معذوری کا سرٹیفکیٹ بھی جاری کیا ہے ،محکمہ تعلیم نے عدالتی حکم کی غلط تشریح کی، عدالتی حکم ہارڈ ایریا کے نام پر کم نمبرز حاصل کرنے والے امیدواروں کے لئے تھا۔
