غزہ کی نصف سے زائدآبادی فاقہ کشی کا شکار،شاداب رضا
کراچی(این این آئی)سربراہ پاکستان سنی تحریک شاداب رضا نقشبندی نے کہا ہے کہ غزہ کی نصف سے زیادہ آبادی فاقہ کشی کا شکار ہے ،اقوام متحدہ کے سیکریٹری جنرل نے غزہ میں قحط کے خطرے سے متعلق رپورٹ کو خطرناک فرد جرم قرار دیا ہے۔
دنیا بھر میں فاقہ کشی کی صورتحال پر نظر رکھنے والے ادارے آئی پی سی نے بھی مئی تک غزہ میں مکمل فاقہ کشی کا انکشاف کیا ہے ،اقوام متحدہ کے چارٹرڈ ،عالمی قوانین ،انسانی حقوق کی علمبرداری کے دعوے کہاں ہیں ،فلسطین ،غزہ خون میں لت پت ہے ، بے گناہ شہریوں کو اسرائیل بمباری کرکے قتل کررہا ہے ،بچوں اور خواتین کو مسلم نسل کشی کے تحت ٹارگٹ کیا جارہا ہے ،اور اب قحط سالی سوالیہ نشان ہے ،انسانی امداد کو غزہ نہ پہنچنے دینا اسرائیل ہٹلر سے بھی زیادہ ظالم بن گیا ہے ،انسانی حقوق کی پامالی اور اسرائیلی حملے کے خلاف اقوام متحدہ کا دہرا معیار انصاف کے قتل کے مترادف ہے ۔ان خیالات کا اظہار انہوں نے غزہ میں خوراک کی قحط اور نہتے شہریوں پر اسرائیل بمباری کی شدید مذمت کرتے ہوئے کیا ۔ شاداب رضا نقشبندی نے کہا کہ اقوام متحدہ اسرائیل کو لگام نہیں ڈال سکتی تو جواب دے ،اقوام متحدہ کا مسئلہ کشمیر اور مسئلہ فلسطین پر مجرمانہ کردار ہے ،سلامتی کونسل کی قرار دادوں کی روشنی میں مسئلہ فلسطین حل کرنے کی بجائے غاصب وناجائزاسرائیل کو قتل غزہ میں مسلم نسل کشی سے بھی نہیں روکا جارہا ،موجودہ صورتحال میں اسلامی ممالک پر جہاد فرض ہوچکا ہے ،پاکستان کے علماء کرام نے بھی جہاد کا فتویٰ دے دیا ہے ،اُمت مسلمہ اسرائیلی کے ظلم وجبر اور فلسطین وغزہ میں مسلم نسل کشی کے خلاف جہاد کیلئے تیار ہیں ،فلسطین وغزہ کے پڑوس میں جتنے بھی مسلم ممالک ہیں وہ جہاد کا پرچم بلند کریں۔
