کچرا مافیا کے خلاف کارروائی، 5افراد گرفتار،ایف آئی آر درج
کراچی(اسٹاف رپورٹر)منیجنگ ڈائریکٹر سندھ سالڈ ویسٹ مینجمنٹ بورڈطارق علی نظامانی کی ہدایت پر ضلع وسطی میں تیموریہ پولیس اسٹیشن نارتھ ناظم آباد میں پولیس نے 5 افراد کو گرفتارکیا۔کچرا چننے کے غیر قانونی کاروبارمیں ملوث گروہ کے خلاف قانونی کارروائی جاری ہے ۔
کچرا پھیلانے ،ڈسٹ بن اور کھلے کچرے میں آگ لگا کر ماحول خراب کرنے اور ڈسٹ بن چوری کرنے والوں کے خلاف سیکشن 144 کے تحت قانونی کارروائی کی جا رہی ہے ۔ تفصیلات کے مطابق ایس ایس ڈبلیوایم بی کے افسران کی نشاندہی پر تیموریہ تھانے کی پولیس نے 5 افرادگرفتار کئے جن کا تعلق کچرا چننے اورکچرے کے غیر قانونی کاروبار کرنے والے گروہ سے ہے ، انکے خلاف ایف آئی آر درج کردی گئی ہیں جبکہ نشاندہی پر مزید گرفتاریاں عمل میں لائی جائیں گی۔سندھ سالڈ ویسٹ مینجمنٹ بورڈ اور کمپنی کے اہلکاروں کی نشاندہی پر علاقہ پولیس نے سیکشن 144 کے تحت قانونی کارروائی کی، یہ افراد سندھ سالڈ ویسٹ مینجمنٹ بورڈ کے کام میں رکاوٹ ڈالنے کے ساتھ شہر گندا کرنے کے بھی ذمہ دار ہیں اور کچرا نالے یا کھلی جگہ پھینک دیتے ہیں جس سے شہر کی صفائی مسلسل متاثر ہورہی ہے ۔ایم ڈی سالڈ ویسٹ نے متعلقہ افسران سے کہا کہ مزید ایسے گروہ کی نشاندہی کریں ۔
