منشیات فروشوں کے خلاف گرینڈ آپریشن کی تیاریاں مکمل، لسٹیں تیار
کراچی(این این آئی)آئی جی سندھ غلام نبی میمن نے شہرقائد میں منشیات فروشی کے خلاف بڑے پیمانے پر کریک ڈاؤن کے احکامات جاری کردیے، ہر علاقے میں منشیات فروشوں کی اے ،بی اور سی کیٹگری لسٹیں بھی تیارکرلی گئیں۔
تفصیلات کے مطابق ملزم ارمغان قریشی اورساحرحسن کی گرفتاری کے بعد منظم منشیات فروشی کے انکشافات پر کراچی میں منشیات فروشی کے خلاف بڑے پیمانے پر کریک ڈاؤن کا فیصلہ کرلیا۔پولیس کو گرینڈ آپریشن کرنے کے احکامات جاری کردیے گئے ، آئی جی سندھ غلام نبی میمن نے نجی ٹی وی سے خصوصی گفتگو کرتے ہوئے کہا کہ خفیہ معلومات سے منشیات فروشوں کی اے ،بی ،سی گیٹگری فہرستیں تیار کرلی گئی ہیں ، منشیات فروشوں کیخلاف بھرپورکریک ڈاؤن کریں۔غلام نبی میمن نے کہا کہ منشیات ایک بین الاقوامی مسئلہ ہے پاکستان یاسندھ مستثنیٰ نہیں، یہاں پر بھی منشیات بہت بڑا مسئلہ بن گیا ہے ، کرائم بھی منشیات فروشی کے ساتھ گٹھ جوڑ میں ہے ۔انہوں نے بتایا کہ اس کاروبار میں اتنا زیادہ منافع ہے کہ یہ رک نہیں پارہا، لوگ یہاں کی مارکیٹ استعمال کرتے ہیں کاروباربڑھتا جارہاہے ، پوری کوشش ہے اگلے چنددنوں میں بھرپورکریک ڈاؤن کریں۔آئی جی سندھ نے کہا کہ منشیات کے عادی افراد چوری کرتے ہیں، شہرکی خوبصورتی خراب کرتے ہیں، منشیات کاکاروبار ایسا گھناؤنا کام ہے جسے روکنے میں عوام نے ساتھ دیناہے، عوام ہمارا ساتھ اسی وقت دں گے جب ہم آن گراؤنڈ ایکشن لیں گے۔ انھوں نے مزید کہا کہ ساحرحسن کیس میں کوشش کی نیٹ ورک میں موجود لوگوں کو پکڑیں، کارروائیاں کیں جو ثبوت ملے ہیں یقین ہے ان کی سزا کاباعث بنیں گے ۔غلام نبی میمن نے بتایا کہ پولیس جب کسی کوپکڑتی ہے تو عدالت میں پولیس کی گواہی نہیں چلتی، جب عوام اورپولیس مل کر کام کریں گے تو فرق پڑے گا، شناخت کرکے تھانوں کوبتایا کہ یہ منشیات فروش آپ کے علاقے میں کام کررہے ہیں، تھانہ ڈسٹرکٹ اورزون کی ذمہ داری ہے کہ وہ ایکشن لیں، جتنا وہ کام کریں گے اتنی ہی سوسائٹی میں بہتری آئے گی۔
