کوئی مویشی منڈی کے ایم سی کی اجازت کے بغیر نہیں لگے گی ، میئر
کراچی(اسٹاف رپورٹر)میئر کراچی بیرسٹر مرتضیٰ وہاب نے کہا ہے کہ ہمارے بہادر فائر فائٹرز قوم کا فخر ہیں جو نہ صرف جانیں بچاتے ہیں۔۔
بلکہ امید کا چراغ بھی روشن کرتے ہیں،ہر لمحہ تیار اپنے فائر فائٹرز کی خدمات پر ہمیں فخر ہے ، فائر فائٹرز کا حوصلہ اور جذبہ قربانی ہر انسان کے لیے مشعل راہ ہے ۔ان خیالات کا اظہار انہوں نے پیر کے روز محکمہ فائر بریگیڈ کے ہیڈ کوارٹر میں شہید ہونے والے فائربریگیڈ کے اہل کاروں کی ’’یادگار شہداء‘‘ کا افتتاح کرنے کے بعد منعقدہ تقریب میں میڈیا کے نمائندوں سے گفتگو کرتے ہوئے کیا۔میئر کراچی نے کے ایم سی فائر بریگیڈ ہیڈ کوارٹر میں ’’یادگار شہداء‘‘ پر شہید فائر فائٹرز کے ایصال ثواب کے لئے دعا اور شہید فائر فائٹرز کے لواحقین میں شیلڈز تقسیم کیں۔کے ایم سی کونسل میں ڈپٹی پارلیمانی لیڈر دل محمد، یوسی چیئرمین، تاجر رہنما عتیق میراور دیگر بھی اس موقع پر موجود تھے ۔تقریب سے خطاب کرتے ہوئے میئرکراچی بیرسٹر مرتضیٰ وہاب نے کہا کہ ہم ایک زندہ قوم کے طور پر فائرفائٹرز کو بطور ہیرو یاد رکھیں گے ۔ ہمیں ان جانثاروں کا شکریہ ادا کرنا چاہیے جو ہر لمحہ خطرے کے لیے تیار رہتے ہیں۔فائر فائٹرز عوام کی جان و مال کا تحفظ کرنے میں بڑا اہم کردار ادا کرتے ہیں جس کے لیے میں بحیثیت میئر ان کا ممنون و مشکور رہوں گا۔مرتضیٰ وہاب نے کہا کہ جب میں ایڈمنسٹریٹر تھا تو پلاسٹک کی تھیلیوں پر پابندی لگانے سے متعلق کونسل سے قرار داد منظور کروائی تھی،کچھ لوگ اس فیصلے کیخلاف عدالت چلے گئے تھے ،ہم نے اس معاملے پر وزیر اعلیٰ سندھ سے بات کی تھی۔15 جون سے شہر میں پلاسٹک کی تھیلیوں پر پابندی ہوگی کیونکہ پلاسٹک کی تھیلیوں کا استعمال ماحول دوست نہیں ہے ۔میئر کراچی نے کہا کہ جون سے باقاعدہ طور پر نالوں کی صفائی شروع ہوگی،ساحلی پٹی کے اطراف دیہی زمینیں ہماری ہیں،امید تھی کہ آج بارش ہوگی ہم نے کے ایم سی کے ملازمین کی چھٹی کو منسوخ کر دیا تھا۔اس مرتبہ کوئی مویشی منڈی کے ایم سی کی اجازت بغیر علاقوں میں نہیں لگے گی۔ہم ماضی کی طرح چائنا کٹنگ نہیں کریں گے ۔ انہوں نے کہا کہ جب آپ وفاق کہتے ہیں تو فیڈریشن کی بات کرتے ہیں،وفاقی حکومت سے ہمارا اختلاف ہوسکتا ہے ۔ کے پی ٹی کی جانب سے جو اشتہار دیا گیا وہ درست نہیں۔
