اسرائیل ظلم و بربریت کی داستان رقم کر رہا ،ثروت اعجاز
کراچی (این این آئی)اسرائیل مسلسل فلسطینیوں کو ظلم و بربریت کا نشانہ بنا رہا ہے مسلم ممالک کو کب ہوش آئے گا،غزہ میں فلسطینیوں کیلئے کوئی پناہ گزیر کیمپ ایسا نہیں ہے جہاں پر اسرائیل نے ظلم کی حدیں کراس نہ کی ہو ۔
اپنے بیان میں پاکستان سنی تحریک کے چیئرمین انجینئر ثروت اعجاز قادری نے کہا کہ اسرائیل مسلسل فلسطینیوں پر ظلم و بربریت کی داستان رقم کر رہا ہے ۔اسرائیل اپنی پشت پر بیٹھی ہوئی طاقتوں کے بل بوتے پر مسلمانوں کو ٹارگٹ کر رہا ہے ۔پوری دنیا میں جنگی قوانین پر عمل کیا جاتا ہے مگر اسرائیل مسلسل جنگی قوانین کی بھی خلاف ورزی کر رہا ہے ۔حالت جنگ میں طبی مراکز پناہ گزیر کیمپ پر حملے نہیں کیے جاتے ہیں مگر اسرائیل نے تمام قوانین کو اپنی جوتے کی نوک پر رکھا ہوا ہے ۔ثروت اعجاز کا مزید کہنا تھا کہ غزہ میں اسرائیلی جارحیت کو روکنے کیلئے تمام مسلم ممالک کو آگے آنا ہوگا جس دن تمام مسلم ممالک نے اپنی طاقت کو پہچان لیا وہ دن اسلام مخالف قوتوں کا آخری دن ہوگا۔اقوام متحدہ اور او آئی سی انسانی حقوق کی علمبردار تنظیمیں ہیں مگر ان کی بھی خاموشی اسرائیل کے حوصلے بڑھا رہی ہے ۔مسلم ممالک کی فلاح و بہبود کیلئے او آئی سی کو بنایا گیا تھا مگر او آئی سی کسی بھی مظلوم مسلمان کی آواز نہیں بن پا رہی ہے ۔صیہونی فورسز حملے کرکے معصوم بے گناہ فلسطینیوں کو مسلسل شہید کررہی ہے ۔ فلسطینیوں کے سر پر اس وقت کھلا آسمان ہے مگر ان کے حوصلے بلند ہیں۔انہوں نے کہا کہ ہر فلسطین کے دل میں شہادت کا جذبہ موجود ہے اور یہی جذبہ ایمان والوں کی نشانی ہوتا ہے ۔اسلامی تعلیمات امن کا گہوارہ ہیں اور ہماری اس امن پسندگی کو اسلام مخالف قوتیں ہماری کمزوری سمجھ رہی ہیں۔
