خطرناک عمارتوں کے سروے کیلئے 4 افسران تعینات
کراچی(مانیٹرنگ ڈیسک)کمشنر کراچی سید حسن نقوی نے شہر کی خطرناک عمارتوں کے سروے کے لیے 4 افسران کو تعینات کر دیا۔
جاری نوٹیفکیشن کے مطابق ان افسران میں عمران الحق، عون عباس، عمران سولنگی، عیسیٰ پلیجو شامل ہیں جنہیں یہ ٹاسک سونپا گیا ہے۔ نوٹیفکیشن میں کہا گیا ہے کہ چاروں افسران ڈپٹی کمشنر جنوبی کے ماتحت کام کریں گے ، جو متعلق ایپ پر خستہ حال عمارتوں کا ڈیٹا اپ لوڈ بھی کریں گے۔ نوٹیفکیشن میں بتایا گیا ہے کہ کمشنر کراچی کی جانب سے افسران کو بر وقت، موثر اور جامع سروے کی سخت ہدایات جاری کی گئی ہیں۔نوٹیفکیشن کے مطابق کراچی ڈویژن کی تمام خطرناک عمارتیں سروے میں شامل کی جائیں گی۔نوٹیفکیشن میں یہ بھی کہا گیا ہے کہ سروے رپورٹ کمشنر کراچی کی مقرر کردہ ٹائم لائن پر مکمل کرنے کی ہدیات کی گئی ہے ۔یاد رہے کہ سانحہ لیاری کے بعد انتہائی خطرناک عمارتوں کو خالی کروانے کا سندھ بلڈنگ کنٹرول اتھارٹی (ایس بی سی اے ) نے ابتدائی پلان تیار کرلیا۔نجی ٹی وی نے ذرائع کے حوالے سے بتایا کہ پہلے مرحلے میں کراچی ساؤتھ میں 51 مخدوش عمارتوں کی نشاندہی کرلی گئی، ناقابل رہائش عمارتوں میں 400 سے زائد افراد مقیم ہیں۔ریونیو ذرائع کا کہنا ہے کہ بعض قدیمی عمارتوں کے سروے ، پلاٹ نمبر میں فرق ہے ، 51 عمارتوں میں 12 سے 15 عمارتیں ہیریٹیج ہیں۔ خیال رہے کہ لیاری بغدادی میں عمارت گرنے کے افسوسناک واقعے کے بعد متاثرہ عمارت کے اطراف کی مخدوش عمارتوں کے رہائشی کسی انجانے خوف کا شکار بھی ہیں۔
