معرکہ حق تجدیدِ عہدوفاکی روشن علامت ،گورنر
کراچی(اے پی پی)گورنر سندھ کامران خان ٹیسوری نے کہا ہے کہ معرکہ حق صرف جشنِ آزادی کی ایک تقریب نہیں بلکہ تجدیدِ عہدِ وفا، قومی وحدت اور عوامی شمولیت کی ایک روشن علامت ہے ۔
ان خیالات کا اظہار انہوں نے ایم کیو ایم پاکستان لیبر ڈویژن کے 66رکنی وفد سے ملاقات کے دوران کیا، جس کی قیادت رضوان بابر نے ۔ ملاقات میں یومِ آزادی پر معرکہ حق کی تقریبات، مزدور طبقے کو درپیش مسائل، روزگار کے مواقع، فلاحی اقدامات اور آئندہ کے مشترکہ لائحہ عمل پر تفصیلی تبادلہ خیال کیا گیا۔ گورنر نے شرکا کو ہدایت دی کہ جشنِ آزادی کی تقریبات میں سرگرم، منظم اور بھرپور انداز میں شرکت کو یقینی بنائیں ۔ انہوں نے محنت کشوں کے کردار کو سراہتے ہوئے کہا کہ ملکی ترقی کی بنیاد مزدور طبقے کی انتھک محنت پر استوار ہے اور ان کی فلاح و بہبود حکومت کی اولین ترجیح ہونی چاہیے ۔ انہوں نے وفد کو یقین دلایا کہ مزدوروں کو درپیش مسائل کے حل کیلئے ہر ممکن تعاون فراہم کیا جائے گا۔ گورنر ہاؤس اب محض ایک سرکاری عمارت نہیں رہا بلکہ یہ عوامی نمائندگی، شمولیت اور شراکت کی علامت بن چکا ہے ، جس کے دروازے محنت کشوں سمیت ہر مخلص پاکستانی کے لیے ہر وقت کھلے ہیں۔ انہوں نے کہا کہ میری خواہش ہے کہ پاکستان کا مزدور طبقہ ایک بااختیار، خوددار اور خوشحال طبقہ بنے جو نہ صرف معیشت کا محرک ہو بلکہ پالیسی سازی میں بھی موثر آواز اور فعال کردار رکھتا ہو۔
