زیارت کیلئے زمینی راستے کی رکاوٹ برداشت نہیں،ایم ڈبلیوایم
کراچی(اسٹاف رپورٹر)وفاقی حکومت زائرین سے پابندی ہٹانے کے موقف کا کوئی مثبت جواب نہیں دے رہی پابندی لگانے سے پہلے اور بعد میں اسٹیک ہولڈرز کو اعتماد میں نہیں لیا گیا۔
زمینی راستے سے زیارت پر جانے کیلئے کسی رکاوٹ کو برداشت نہیں کریں گے ۔جن زائرین کے ایرانی ویزے لگ چکے ہیں اپنے سفری سامان سمیت تیار رکھیں، 6 اگست کو زائرین کے ہمراہ کراچی سے ریمدان بارڈر مارچ کیا جائے گا۔ان خیالات کا اظہار وائس چیئرمین مجلس وحدت مسلمین علامہ احمد اقبال رضوی نے کراچی میں مسجد امام بارگاہ شہدائے کربلا انچولی میں منعقدہ زائرین امام حسینؓ کانفرنس کے صدارتی خطاب میں کیا۔انہوں نے کہا کہ پوری دنیا میں عالمی اربعین چہلم امام حسینؓ 20 صفر، 15 اگست کے دن ہوگا،عالمی اربعین پر پاکستان سے بھی لاکھوں عزاداران زمینی و ہوائی رستوں سے شرکت کریں گے ۔وفاقی حکومت کی جانب سے اربعین پر جانے والے زائرین کے زمینی رستوں پر پابندی مذہبی و انسانی حقوق کی خلاف ورزی ہے ،بلوچستان اربعین حسینؓ کے لئے عراق روانگی سے قبل دفعہ 144 کا نفاز سازش ہے ،۔زیارات پر جانا ہمارا آئینی و قانونی حق ہے عوام کی جان و مال کا تحفظ ریاست کی ذمہ داری ہے ۔کانفرنس میں زیارات ٹریول و ٹور آپریٹرز، قافلہ سالار ،پلگرم ایسوسی ایشن کے رہنما،ہیت آئمہ مساجد کے رہنما مولانا صادق تقوی، مولانا حیدر عباس نے شرکت کی۔
