کروڑوں کی سینکڑوں بوگیاں ناکارہ ، نشئیوں کی آماجگاہ
لاہور(اپنے کامرس رپورٹر سے )ریلوے کی کروڑوں روپے کی خراب بوگیاں نشئیوں اور چوروں کے سپرد،ریلوے نے کروڑوں روپے کی خراب بوگیوں کو نظر انداز کردیا ،پھاٹک نمبر ایک، ہربنس پورہ، جلو پھاٹک، واشنگ لائن سمیت مختلف مقامات پر ریلوے کی سینکڑوں خراب بوگیاں کھڑی ہیں۔
ذرائع کے مطابق خراب بوگیاں عرصہ دراز سے زنگ آلود ہوکر بالکل ہی ناکارہ ہورہی ہیں،کھڑی بوگیوں کے قریب حفاظتی اقدامات نہ ہونے سے نشئی اور چور لوہا چوری کررہے ہیں،ریلوے ملازمین کا کہنا ہے کہ ریلوے خسارے کا رونا روتی ہے اور اپنے ملازمین کو بروقت تنخواہ ادا کرنے سے بھی قاصر ہے ،جبکہ انتظامیہ نے کروڑوں کی کوچز اور دیگر سامان چوروں کے لیے کھلا چھوڑ رکھا ہے ۔ذرائع کا کہنا ہے کہ چور اور نشئی بوگیوں کو کاٹ کر لوہا فروخت کردیتے ہیں،ریلوے کا عملہ اور ریلوے پولیس بھی ان خراب بوگیوں کی حفاظت نہیں کررہی ہے ،کھڑی بوگیوں سے لاکھوں روپے کا دیگر سامان بھی چوری ہوچکا ہے ۔ریلوے ان بوگیوں کو ٹھیک یا پھر نیلام کرا کر کم سے کم ریٹائرڈ ملازمین کی واجبات ہی ادا کردے ۔ ترجمان ریلوے کا کہنا ہے کہ ریلوے کی خراب بوگیوں کی نیلامی پر پابندی عائد ہے ،پابندی ختم ہوتے ہی بوگیوں اور دیگر خراب سامان کی نیلامی کی جائے گی۔
