ہماری ذرا سی توجہ یتیم کے بکھرے خواب جوڑ سکتی:وزیر تعلیم
لاہور(ایجوکیشن رپورٹر)صوبائی وزیر تعلیم رانا سکندر حیات نے کہا ہے کہ یتیم بچوں کا دن ہمیں معاشرتی ذمہ داریوں کا احساس دلاتا ہے۔
اتوار کو یتیموں کے دن کے حوالے سے اپنے ایک پیغام میں انہوں نے کہا کہ یتیموں کے خوابوں کو حقیقت میں بدلنے کیلئے اجتماعی کوششیں کرنا ہو گی، یتیم بچوں کو والدین دینا ہمارے اختیار میں نہیں، تاہم ہم انہیں تعلیم تو دے سکتے ہیں۔ انہوں نے کہا کہ یتیم سے صرف اظہار ہمدردی کافی نہیں ،ہمیں مل جل کر ان کی تعلیمی کفالت کا فرض بھی ادا کرنا ہے ۔ کوشش کریں یتیم کا بچپن محرومی کی داستان بننے کی بجائے تعلیم کی طاقت سے کامیابی کی کہانی بنے اور ہر فرد عہد کرے کہ کسی یتیم کا ہاتھ تھام کر اسے سکول تک لے کر جائے گا۔ وزیر تعلیم نے کہا کہ ہماری ذرا سی توجہ کسی یتیم کے بکھرے خوابوں کو جوڑ سکتی ہے ۔ آج کے دن ہر فرد یتیموں کیلئے ہمدردی کے جذبات کو عملی اقدامات میں بدلنے کا عزم کرے۔ آئیں ہم سب مل کر ایسا معاشرہ تشکیل دیں جہاں کوئی بچہ تعلیم سے محروم نہ ہو۔
