ہائیکورٹ :لاہور ڈویژن میں گولی سے کتا مار مہم روکنے کا حکم
لاہور(کورٹ رپورٹر)لاہور ہائیکورٹ نے لاہور ڈویژن میں گولیوں سے کتا مار مہم روکنے کا حکم دیتے ہوئے پنجاب حکومت، ڈی سی لاہور اور ایم سی ایل سے جواب طلب کرلیا۔
درخواست گزار کے مطابق دو ہفتوں میں ایک ہزار سے زائد کتوں کو گولی ماری کر تلف کیا گیا۔ لاہور ہائیکورٹ کے جسٹس شاہد کریم نے ایرج حسن سمیت دیگر کی درخواست پر سماعت کی، درخواست میں پنجاب حکومت، کمشنر لاہور ڈویژن ،ڈپٹی کمشنر لاہور سمیت دیگر کو فریق بنایا گیا ہے ،دوران سماعت درخواست گزار کے وکیل نے کہاکہ آوارہ کتوں کو ویکسین کے ذریعے تلف کرنے کی پالیسی مرتب کی گئی تھی، اسکے باوجودانتظامیہ پالیسی پر عمل درآمد کی بجائے گولی مارکر کتوں کو تلف کررہی ہے ۔وکیل نے نکتہ اٹھایا کہ درخواست گزار کے مطابق دو ہفتوں میں ایک ہزار سے زائد کتوں کو گولی مار کر تلف کیا گیا۔ درخواست میں اینیمل برتھ کنٹرول پالیسی پر عمل درآمد کی استدعا کی گئی ۔ لاہور ہائیکورٹ نے کتا مار مہم کے خلاف حکم امتناع جاری کرتے ہوئے سرکاری وکیل کو ہدایات لیکر آئندہ سماعت پر پیش ہونے کا حکم دے دیا۔
