علامہ احمد لدھیانوی کا مرکزی مسلم لیگ سیکرٹریٹ کا دورہ
لاہور (آن لائن) پاکستان مرکزی مسلم لیگ کے جوائنٹ سیکرٹری قاری محمد یعقوب شیخ نے کہا صلاحیت بڑھاؤ، اپنا کماؤ مہم کے تحت ملک بھر سے نوجوان رجسٹریشن کروا رہے ہیں۔۔۔
بڑھتی مایوسی اور بے روزگاری کے خاتمے کے لئے اپنا کماؤ پروگرام انتہائی اہم ہے ،نوجوانوں کی تربیت کر کے انہیں مفت ہنر فراہم کرنا مرکزی مسلم لیگ کے منشور خدمت کی سیاست کا عملی نمونہ ہے ۔ ان خیالات کا اظہار انہوں نے اہلسنت والجماعت پاکستان کے سربراہ مولانا علامہ احمد لدھیانوی سے ملاقات کے دوران بات چیت کرتے ہوئے کیا،علامہ احمد لدھیانوی نے پاکستان مرکزی مسلم لیگ کے مرکزی سیکرٹریٹ کا دورہ کیا،اس موقع پر رابطہ علما و مشائخ پاکستان کے سیکرٹری سید عبدالوحید شاہ اور مرکزی مسلم لیگ لاہور کے جنرل سیکرٹری ڈاکٹر مزمل اقبال ہاشمی بھی موجود تھے ۔ملاقات کے دوران ملکی سیاسی صورتحال، بھارت کی جانب سے غیر ذمہ دارانہ اقدامات، اور غزہ پر اسرائیلی حملوں پر تبادلہ خیال کیا گیا۔ قاری یعقوب شیخ کا کہنا تھا بھارت کی آبی جارحیت کے خلاف مرکزی مسلم لیگ تحریک جاری رکھ کر قوم کو متحد وبیدار کرے گی،مرکزی مسلم لیگ یکم مئی سے صلاحیت بڑھاؤ، اپنا کماؤ مہم کا آغاز کر رہی ہے ۔ 50 ہزار سے زائد رجسٹریشن ہو چکی ہے ۔
