کینٹ سٹیشن پر ناقص اشیا کی مہنگے داموں فروخت عروج پر
ملتان(خبرنگارخصوصی)ملتان کینٹ ریلوے سٹیشن کے سٹالوں پر ناقص اور مہنگی اشیاء اور مضر صحت اشیاء خورد و نوش کی فروخت عروج پر پہنچ گئی۔ ریلوے ملتان ڈیژن ناجائز منافع خوروں اور بیماریاں بانٹنے والوں کے خلاف کارروائی سے گریزاں ہے ۔
محکمے کے افسر کبھی کبھار چھاپے مار کر ایک دو ہزار جرمانے کر کے ‘‘سب اچھا ہے ’’ کے دعوے دار ہیں۔ تفصیلات کے مطابق ملتان کینٹ ریلوے سٹیشن پر معیاری اشیاء کی خرید وفروخت کو یقینی نہیں بنایا جا سکا، متعدد مقامات پر مضر صحت اشیاء فروخت کی جاتی ہیں جس سے مسافروں کو شدید پریشانی کا سامنا ہے ۔سٹالوں پر کھانے پینے کیلئے استعمال ہونے والے برتنوں کی صفائی کا انتظام بھی ناقص ہے جس کی وجہ سے مسافر ریلوے سٹیشن پر اشیاء کو کھانے سے پرہیز کرتے ہیں جبکہ سٹیشن پر کام کرنے والے مزدوروں کو شدید پریشانی کا سامنا ہے ۔ دوسری طرف پینے کے صاف پانی کا نہ ہونا بھی سٹیشن پر کام کرنے والوں اور مسافروں کے لئے مشکلات کا باعث ہے ۔ اشیائے خورد ونوش کی قمتیں بھی عام مارکیٹ سے زیادہ ہیں جن کو کنٹرول کرنے میں محکمہ ریلوے ناکام نظر آتا ہے ۔ ریلوے حکام کا کہنا ہے کہ سٹالوں پر چھاپے مارے جاتے ہیں سٹالوں کو سیل اور مالکان کو جرمانے بھی کیے جاتے ہیں ۔ناقص اور مضر صحت اشیاء کی خرید وفروخت کی اجازت نہیں دی جائے گی۔
