عید تعطیلات پر بھی کریک ڈاؤن،بجلی چوروں کی شامت،ٹیمیں تشکیل
ملتان (خصوصی رپورٹر) چیف ایگزیکٹو آفیسر میپکو انجینئر ناصر ایاز خان گرمانی نے عیدالاضحی کی سرکاری تعطیلات میں بجلی چوروں کے خلاف کریک ڈاؤن جاری رکھنے کے احکامات دے دئیے ہیں۔
میپکو ریجن کے 9آپریشن سرکلوں میں بجلی چوری پکڑنے کے لئے سب ڈویژنل سطح پر ٹیمیں تشکیل دیدی گئی ہیں جو 17، 18 اور 19 جون 2024ء کو جنوبی پنجاب میں بجلی چوروں کے خلاف ڈے اینڈ نائٹ آپریشن کریں گے ۔ بجلی چوروں کو جرمانے عائد کرکے مقدمات کا اندراج بھی کروایاجائیگا اور ان کی گرفتاریاں بھی کروائی جائیں گی۔ چیف ایگزیکٹو آفیسر نے کہا کہ بجلی چوری قومی جرم ہے لہذا صارفین اس سے اجتناب کریں اور بجلی چوری سے گریز کریں۔ صارفین اپنے بجلی بل بروقت اداکرکے قومی فریضہ پورا کریں۔انہوں نے مزید کہا ہے کہ محکمہ بجلی کے نادہندہ افراد اور محکموں کو حتمی وارننگ جاری کی جائے گی اور عدم ادائیگی پر عید کے بعد ان کے خلاف گرینڈ آپریشن کیا جائے گا۔ صارفین مشکل صورتحال سے بچنے کیلئے فوری ادائیگیاں کریں۔
