ایسوسی ایٹ پروفیسرز ترقی کیسز، سکرونٹی میں سنگین خامیاں
ملتان (خصوصی رپورٹر)ڈائریکٹر پبلک انسٹرکشن کالجز پنجاب کی جانب سے تمام ڈویژنل ڈائریکٹرز کو ارسال کیے گئے ایک اہم مراسلے میں مرد ایسوسی ایٹ پروفیسرز کی ترقی سے متعلق کیسز کی سکرونٹی کے دوران متعدد کمیوں اور خامیوں کی نشاندہی کی گئی ہے۔۔۔
مراسلے میں واضح کیا گیا ہے کہ سنیارٹی نمبرز رکھنے والے انیس ایسوسی ایٹ پروفیسرز کے ترقی کیسز نامکمل پائے گئے ہیں۔ مراسلے کے مطابق ان خامیوں کو دور کروانا صرف متعلقہ افسران کی ذمہ داری نہیں بلکہ سنیارٹی نمبر ایک سے 180تک تمام افسران کی مشترکہ ذمہ داری ہے ۔ ہدایت میں کہا گیا ہے کہ جب تک نشاندہی شدہ نقائص مکمل طور پر دور نہیں کیے جاتے ، اس وقت تک تمام ترقی کیسز زیر التوا رہیں گے اور ترقی کا عمل آگے نہیں بڑھ سکے گا۔ڈائریکٹر پبلک انسٹرکشن کالجز نے ڈویژنل ڈائریکٹرز کو ہدایت کی ہے کہ متعلقہ اساتذہ سے فوری طور پر ضروری دستاویزات مکمل کرائی جائیں اور تمام تکنیکی خامیاں دور کی جائیں تاکہ ترقی کے عمل میں مزید تاخیر سے بچا جا سکے ۔ذرائع کے مطابق اگر مقررہ وقت میں خامیوں کا ازالہ نہ کیا گیا تو اس کے منفی اثرات پوری اساتذہ برادری کو برداشت کرنا پڑ سکتے ہیں۔ اس لیے ضروری ہے کہ ترقی سے متعلق کیسز کی تیاری اور تکمیل سنجیدگی، ذمہ داری اور پیشہ ورانہ انداز میں کی جائے ، تاکہ اساتذہ کا دیرینہ مسئلہ حل ہو سکے ۔
