زکریا یونیورسٹی ہراسانی کیس میں انکوائری رپورٹ تاخیر کا شکار
ملتان (خصوصی رپورٹر)زکریا یونیورسٹی ملتان میں ہراسانی کے ایک اہم کیس کی انکوائری رپورٹ میں تاخیر کے باعث متاثرہ اسسٹنٹ پروفیسر ڈاکٹر شازیہ افضل نے وائس چانسلر بی زیڈ یو کو مراسلہ ارسال کر دیا ہے۔۔۔
ذرائع کے مطابق ڈاکٹر شازیہ افضل نے تحریری یاددہانی میں انکوائری کی موجودہ صورتحال اور رپورٹ کی کاپی فراہم کرنے کی درخواست کی ہے ۔متاثرہ نے بتایا کہ انہوں نے 4 دسمبر 2025 کو ای میل کے ذریعے اپنی شکایت پر شروع ہونے والی انکوائری کی تازہ پیش رفت جاننے کی درخواست دی تھی۔ اس سے قبل رجسٹرار آفس سے بھی رپورٹ کے اسٹیٹس اور کاپی کے حصول کے لیے رابطہ کیا گیا، جہاں انہیں تحریری طور پر آگاہ کیا گیا کہ رپورٹ رجسٹرار آفس کو موصول نہیں ہوئی، تاہم زبانی بتایا گیا کہ رپورٹ وائس چانسلر آفس کو بھیج دی گئی ہے ۔ڈاکٹر شازیہ نے اپیل کی کہ انہیں انکوائری کے موجودہ مرحلے سے باضابطہ آگاہ کیا جائے اور اگر رپورٹ وائس چانسلر آفس کو موصول ہو گئی ہے تو بطور شکایت کنندہ مصدقہ کاپی فراہم کی جائے ۔ رپورٹ میں تاخیر کی وجہ سے انہیں شدید ذہنی دباؤ، بے چینی اور غیر یقینی صورتحال کا سامنا ہے ، جبکہ نتائج جاننا ان کے لیے نہایت اہم ہے ۔انہوں نے یونیورسٹی انتظامیہ سے فوری توجہ اور بروقت جواب کی درخواست کی اور امید ظاہر کی کہ انتظامیہ انصاف کے تقاضے پورے کرتے ہوئے شفاف طریقے سے انہیں انکوائری کی پیش رفت اور نتائج سے آگاہ کرے گی۔
