نہر لوئر جہلم اورراجباہوں کے بیسیوں مقامات پر خستہ حال پشتے
سرگودھا(سٹاف رپورٹر)بد انتظامی اور ذمہ داروں کی دانستہ چشم پوشی کے باعث نہر لوئر جہلم اورراجباہوں کے بیسیوں مقامات پر انتہائی کمزور اورخستہ حال پشتے بڑھتے ہوئے۔۔۔
زمینی کٹاؤ کی وجہ سے آئندہ ممکنہ سیلابی صورتحال میں قریبی آبادیوں کے مکینوں کے ساتھ ساتھ کاشتکارسراپا احتجاج بن کر رہ گئے ہیں ذرائع کے مطابق اس امر کا خدشہ مانیٹرنگ ٹیم نے بھی کیا ہے مگر تاحال اس سلسلہ میں اقدامات نہیں اٹھائے جا رہے ،مکینوں کے مطابق ایک عرصہ سے نہر کے پشتوں کو مضبوط کروانے کیلئے مقامی سطح پر سنجیدگی کا مظاہرہ سامنے نہیں آیا ،چند ایک مقامات پر پلوں کے قریب پشتے مضبوط کئے گئے مگر ان میں بھی مبینہ طور پر ناقص میٹریل استعمال ہونے سے صورتحال قابل تسلی نہیں جبکہ بیسیوں مقامات پر زمینی کٹاؤ بڑھنے سے قریبی آبادیوں اور سینکڑوں ایکڑ زرعی اراضی کو خطرات در پیش ہیں،یہی نہیں کسی بھی نا گہانی صورتحال میں کوئی منصوبہ بندی نہیں جا رہی جس کے باعث لوگوں میں تشویش پائی جا رہی ہے۔ انہوں نے ارباب اختیار کو فوری طور پر صورتحال کا نوٹس لیتے ہوئے اقدامات اٹھانے کی ضرورت پر زور دیا گیا ہے ۔
