لاہور میں ٹریفک حادثات،4باراتیوں سمیت6 افراد جاں بحق،19زخمی
رائیونڈ میں ٹرالر سے ٹکرا کر باراتیوں کی بس الٹنے پر 4افراد، کاہنہ میں کار کی ٹکرسے 2راہگیر چل بسے کالا شاہ کاکو میں تبلیغی اجتماع سے واپسی پر ڈالہ الٹ گیا، کوہاٹ کے رہائشی 2 نوجوان زندگی کی بازی ہار گئے
لاہور، رائیونڈ،نارنگ منڈی ،کالا شاہ کاکو(کرائم رپورٹر، نیوز ایجنسیاں،نمائندہ دنیا،نامہ نگار )صوبائی دارالحکومت میں رائیونڈ سمیت مختلف علاقوں میں ٹریفک حادثات،4باراتیوں سمیت 6افراد جاں بحق،19زخمی ہو گئے ۔ادھر کالا شاہ کاکو میں موٹروے پر تبلیغی اجتماع سے واپس آنیوالوں کا ڈالہ الٹنے سے کوہاٹ کے رہائشی 2نوجوان جبکہ ٹرین تلے آکرمقامی نوجوان دم توڑ گیا ، زخمیوں کو مختلف ہسپتالوں میں منتقل کر دیا گیا۔تفصیلات کے مطابق تھانہ رائیونڈ کے علاقہ کڑیال میں جیا بگا پھاٹک کے قریب باراتیوں سے بھری بس تیز رفتاری کے باعث بے قابو ہو کر ٹرالر سے ٹکراکر الٹ گئی جس کے نتیجہ میں بس میں سوار35 سالہ محمد شریف،42 سالہ رفاقت،45 سالہ اکرام اور 15 سالہ یاسمین موقع پر ہی دم توڑ گئے جبکہ بچوں اور خواتین سمیت 19افراد زخمی ہو گئے ۔زخمیوں میں8 سالہ نور فاطمہ ،10سالہ عبداللہ ،12سالہ کشف ،14 سالہ علی ،15سالہ شیروز ،16سالہ سونیا ، 18سالہ علی،25سالہ حنفہ،30سالہ امجد ، 35 سالہ عبداللہ ، 36سالہ یوسف ،36سالہ بلقیس بی بی ،38 سالہ آسیہ ،40سالہ یاسین، 40سالہ منیبہ ، 47سالہ حسینہ ،50سالہ ہدایت علی اور80سالہ جان محمد شامل ہیں ۔
اطلاع پر ریسکیو 1122 اہلکاروں نے موقع پر پہنچ کر بھاری مشینری کے ذریعے گاڑیوں میں پھنسے افراد کو نکالا ۔ادھر کاہنہ کاچھا انٹرچینج رنگ روڈ پر تیز رفتار گاڑی کی ٹکر سے سڑک عبور کرنے والے 2راہگیر دم توڑ گئے ۔واقعے کے بعد کاہنہ پولیس نے فوری کارروائی کرتے ہوئے ڈرائیور کو گرفتار کرکے کارکو قبضے میں لے لیا،حادثے کی مزید تفتیش جاری ہے ۔ دوسری طرف لاہور ،سیالکوٹ موٹروے پر انٹرچینج نواحی گاؤں بلخے کے قریب تبلیغی اجتماع سے واپس آنیوالے کارکنوں کا تیز رفتار ڈالہ ڈیوائیڈر سے ٹکراکر الٹ کر سڑک سے نیچے 12 فٹ گہرے گڑھے میں جاگر اجس کے نتیجے میں تبلیغی جماعت کے دو کارکن 38 سالہ شکیل احمد اور 26 سالہ کوثر امین موقع پر جاں بحق جبکہ ڈرائیور فیض اﷲسمیت 5 افراد شدید زخمی ہو گئے ،جاں بحق افرادا کا تعلق ضلع کوہاٹ سے بتایا گیا ہے ۔ جبکہ کالاخطائی روڈ پر جنڈیالہ کے قریب ٹریکٹر ٹرالی اور کیری ڈبہ کی آپس میں ٹکر کے نتیجہ میں خواتین سمیت پانچ افراد زخمی ہو گئے ،تمام حادثات کے زخمیوں کو ہسپتالوں میں منتقل کر دیا گیا جہاں 3 افراد کی حالت نازک بتائی جا رہی ہے ۔ادھر کالا شاہ کاکو میں پیپلز کالونی کا رہائشی عاشق حسین ریلوے لائن کے ساتھ ساتھ سیر کر رہا تھا کہ اس دوران فیصل آباد سے لاہور آنے والی ٹرین تلے آ کر دم توڑ گیا، پولیس نے لاش ورثا کے حوالے کر دی۔
