وزیراعظم کی ترکمان صدر کو تجارت کیلئے پاکستانی بندرگاہیں استعمال کرنے کی پیشکش
اشک آباد: (دنیا نیوز) وزیراعظم شہباز شریف نے ترکمانستان کے صدر سردار بردی محمدوف کو تجارت کے لیے کراچی اور گوادر کی بندرگاہیں استعمال کرنے کی پیشکش کر دی۔
وزیراعظم شہباز شریف کی ترکمانستان کے صدر سردار بردی محمدوف سے دوطرفہ ملاقات ہوئی، شہباز شریف نے ترکمانستان کے ساتھ زمینی اور سمندری راستوں کے ذریعے روابط بڑھانے کی پاکستان کی خواہش کا اعادہ کیا۔
وزیراعظم نے کہا کہ کراچی اور گوادرکی بندرگاہوں کا جغرافیہ مثالی ہے، ترکمانستان کراچی اور گوادر کی بندرگاہوں کے ذریعے جنوبی ایشیا اور اس سے باہر اپنی رسائی کو بڑھانے کے لیے بروئے کار لاسکتا ہے۔
.jpg)
ملاقات کے دوران شہباز شریف نے ترکمانستان کی مستقل غیرجانبداری کی 30 ویں سالگرہ اور اقوام متحدہ کی جانب سے 2025 کو امن اور اعتماد کا بین الاقوامی سال قرار دینے پر ترکمان صدر سردار بردی محمدوف کو مبارکباد دی۔
پاکستان اور ترکمانستان کے درمیان تاریخی اور برادرانہ تعلقات کی اہمیت پر زور دیتے ہوئے وزیراعظم نے دونوں ممالک کے درمیان دوطرفہ تعلقات بالخصوص تجارتی اور اقتصادی روابط کو مضبوط بنانے کے عزم کا اظہار کیا۔
وزیر اعظم نے رواں برس کے آغاز پر ایران اسرائیل جنگ کے دوران پاکستانی شہریوں کو ایران سے بحفاظت نکالنے کے لیے فراہم کی جانے والے تعاون پر ترکمان قیادت اور حکومت کا تہہ دل سے شکریہ ادا کیا۔
یہ بھی پڑھیں: شہباز شریف 2 روزہ دورے پر ترکمانستان پہنچ گئے
ترکمانستان کی جانب سے پاکستانی وفد کی شاندار مہمان نوازی پر وزیراعظم نے ترکمان صدر کا شکریہ ادا کیا، وزیراعظم نے ترکمانستان کے عوام کے قومی رہنما گربنگولی بردی محمدوف کیلئے نیک خواہشات کا اظہار کیا۔
وزیرِ اعظم نے ترکمانستان کی عوام کے قومی رہنما اور صدر سردار بردی محمدوف کو آئندہ برس پاکستان کے سرکاری دورے کرنے کی دعوت کا اعادہ کیا۔
ترکمانستان کے صدر نے وزیر اعظم کے دورے اور امن و اعتماد کے بین الاقوامی فورم میں شرکت پر شکریہ ادا کیا۔
صدر سردار بردی محمدوف نے کہا کہ ترکمانستان پاکستان کے ساتھ باہمی دلچسپی کے متعدد شعبوں میں دوطرفہ تعاون کو بڑھانے کا خواہاں ہے۔
