پاکستان نے برطانوی ایئرلائن نورس اٹلانٹک کو پروازوں کی اجازت دے دی، وزیر دفاع
اسلام آباد: (دنیا نیوز) وزیر دفاع خواجہ آصف نے کہا ہے کہ پاکستان نے برطانیہ کی ایئرلائن نورس اٹلانٹک کو پروازوں کی اجازت دے دی ہے۔
سماجی رابطے کی ویب سائٹ ٹوئٹر پر اپنے پیغام میں ن لیگی رہنما خواجہ آصف نے کہا کہ یہ ایئرلائن لندن، مانچسٹر اور برمنگھم سے پاکستان کے دارالحکومت اسلام آباد کیلئے براہِ راست فضائی سروس کا آغاز کرے گی۔
— Khawaja M. Asif (@KhawajaMAsif) January 1, 2026
انہوں نے کہا کہ پاکستان کیلئے بین الاقوامی ایئر لائنز کی پروازوں میں اضافے سے فضائی شعبے میں صحت مند مسابقت کو فروغ ملے گا، جس کے نتیجے میں مسافروں کو عالمی معیار کی سہولیات فراہم ہوں گی اور ہوائی کرایوں میں توازن پیدا ہوگا۔
ایک دوسرے ایکس پیغام میں وزیر دفاع کا کہنا تھا کہ 6 سال کے طویل وقفے کے بعد پی آئی اے 29 مارچ 2026ء سے براہِ راست لندن ہیتھرو کیلئے اپنی پروازیں دوبارہ شروع کر رہی ہے۔
— Khawaja M. Asif (@KhawajaMAsif) January 1, 2026
انہوں نے کہا کہ یہ اہم کامیابی پاکستان سول ایوی ایشن اور پی آئی اے کی مسلسل محنت اور کوششوں کا نتیجہ ہے جس کے ذریعے پی آئی اے کی بین الاقوامی ساکھ کو دوبارہ بہتر بنایا جا رہا ہے، جو سابق وزیرِ ہوابازی کے ایک غیر ذمہ دارانہ بیان سے متاثر ہوئی تھی۔
خواجہ آصف کا مزید کہنا تھا کہ ابتدائی طور پر ہفتے میں 4 پروازیں چلائی جائیں گی، جنہیں آئندہ مزید بڑھانے کا منصوبہ ہے، تاکہ بیرونِ ملک مقیم پاکستانیوں کو اپنے وطن سے دوبارہ جوڑا جا سکے۔
