زیادتی کے ملزم کی عدالت سے بریت، متاثرہ خاتون نے خود کو آگ لگا لی
قصور: (ویب ڈیسک) زیادتی کے ملزم کانسٹیبل کے بری ہونے پر متاثرہ خاتون نے خود پر پیٹرول چھڑک کر آگ لگا لی۔
رپورٹس کے مطابق قصور کے قریب متاثرہ خاتون نے خود کو آگ لگا لی جس کے بعد انہیں ہسپتال منتقل کیا گیا، خاتون کے شوہر نے بتایا کہ اہلیہ نے پولیس کانسٹیبل کے خلاف مقدمہ درج کروایا تھا، انصاف نہ ملنے پر خود کو آگ لگائی۔
دوسری جانب پولیس ترجمان کا کہنا ہے کہ متاثرہ خاتون نے 2022ء میں پولیس کانسٹیبل رفیق کے خلاف زیادتی کا مقدمہ درج کروایا تھا جس پر محکمے نے ملزم رفیق کو نوکری سے برخاست کر دیا تھا، عدالت نے آج ڈی این اے میچ نہ ہونے پر ملزم کانسٹیبل رفیق کو مقدمے سے بری کر دیا جس پر متاثرہ خاتون نے اپیل میں جانے کی بجائے خود پر پیٹرول چھڑک کر خودکشی کی کوشش کی۔
پولیس ترجمان نے مزید کہا ہے کہ ڈی پی او محمد عیسیٰ خان نے ایس پی انویسٹی گیشن کو انکوائری کے احکامات جاری کر دیے ہیں، اگر واقعے میں تفتیشی افسر کی ملی بھگت پائی گئی تو محکمانہ اور قانونی کارروائی عمل میں لائی جائے گی۔
