یوٹیوب نے صارفین کو کمانے کا ایک نیا ذریعہ فراہم کر دیا
لاہور: (ویب ڈیسک) ویڈیو شیئرنگ سائٹ یوٹیوب نے صارفین کے لیے آمدنی کے حصول کا ایک نیا ذریعہ متعارف کرا دیا۔
اگر آپ یوٹیوب پر لائیو سٹریمنگ کرنا پسند کرتے ہیں تو کمپنی کی جانب سے کمانے کا نیا موقع فراہم کیا جا رہا ہے۔
یوٹیوب کی جانب سے کریٹیرز کے لیے ایک نیا فیچر جیولز متعارف کرایا جا رہا ہے جس سے وہ ورٹیکل لائیو سٹریمز کے ذریعے آمدنی حاصل کرسکیں گے، جیولز ایک ایسی ڈیجیٹل کرنسی ہے جسے آپ پسندیدہ کریٹیرز کو گفٹ کے طور پر بھیج سکیں گے۔
یہ گفٹ انیمیشن کی شکل میں لائیو سٹریمز کی سکرین پر نظر آئے گا، یہ فیچر ٹک ٹاک کے لائیو گفٹ فیچر سے ملتا جلتا ہے جس میں صارفین کوائنز خرید کر تحفے کے طور پر بھیجتے ہیں۔
یوٹیوب کی جانب سے جاری بیان میں بتایا گیا کہ جب ناظرین جیولز کو استعمال کر کے گفٹ ارسال کریں گے تو کریٹیرز کو روبیز موصول ہوں گے، ایک روبی کے عوض ایک امریکی سینٹ ملے گا، یعنی 100 روبیز کے بدلے ایک ڈالر ملے گا۔
اگلے 3 ماہ تک اہل کریٹیرز ان جیولز سے ہونے والی آمدنی پر 50 فیصد بونس بھی حاصل کرسکیں گے، کریٹیرز کو یہ تحفہ اسی وقت مل سکے گا جب وہ ورٹیکل لائیو سٹریم یوٹیوب پر کریں گے اور صارفین صرف موبائل ایپ پر ہی جیولز بھیج سکیں گے۔
یہ فیچر فی الحال امریکا میں صارفین کے لیے متعارف کرایا جارہا ہے مگر امید ہے کہ آنے والے مہینوں میں اسے دنیا کے دیگر ممالک میں بھی متعارف کرایا جاسکتا ہے، اس فیچر سے آمدنی کا حصول ان کریٹیرز کے لیے ممکن ہوگا جو یوٹیوب پارٹنرز پروگرام کا حصہ ہوں گے۔
