کراچی :نیول چیف کا نمائش آئیڈیاز 2024کا دورہ، دفاعی صلاحیتیں بڑھانے کا عزم
کراچی :(دنیا نیوز) چیف آف دی نیول سٹاف ایڈمرل نوید اشرف کا کراچی ایکسپو سینٹر میں جاری بین الاقوامی دفاعی نمائش اور سیمینار آئیڈیاز 2024 کا دورہ کیا۔
پاک فوج کے شعبہ تعلقات عامہ (آئی ایس پی آر) کے مطابق نیول چیف نے نمائش میں شریک غیر ملکی عسکری حکام، دفاعی صنعت کے نمائندگان اور نمائش کے شرکاء سے ملاقاتیں کیں۔
ترجمان پاک فوج کا کہنا تھا کہ نیول چیف نے ملاقاتوں میں بحری دفاعی ٹیکنالوجی میں ترقی، عالمی دفاعی رجحان اور مستقبل کے تعاون کے امکانات پر تبادلہ خیال کیا۔
ایڈمرل نوید اشرف نے اپنے دورے کے دوران علاقائی سلامتی کو مستحکم کرنے میں بین الاقوامی شراکت داری کی اہمیت، پاکستان کی دفاعی صلاحیتوں کو مزید بڑھانے پر زور دیتے ہوئے کہا کہ عالمی دفاعی شراکت داروں کے ساتھ تعاون کو فروغ دینے کے عزم کا اظہار کرتے ہیں۔
