جی ایچ کیو حملہ: عمران خان و دیگر ملزمان پر فرد جرم چوتھی بار مؤخر
راولپنڈی: (دنیا نیوز) سانحہ 9 مئی کے جی ایچ کیو حملہ کیس میں بانی پی ٹی آئی عمران خان سمیت دیگر ملزمان پر فرد جرم چوتھی بار مؤخر ہوگئی۔
انسداد دہشت گردی عدالت راولپنڈی کی خصوصی عدالت کے جج امجد علی شاہ نے جی ایچ کیو حملہ کیس کی سماعت کی، کیس میں مزید 10 ملزمان نے عدم ثبوت کی بنیاد پر بریت کی درخواستیں دائر کر دیں۔
سربراہ عوامی مسلم لیگ شیخ رشید احمد عدالت سے حاضری کے بعد واپس روانہ ہو گئے جبکہ تمام ملزمان کی عدم حاضری کے باعث آج بھی ملزمان پر فرد جرم عائد نہ ہو سکی۔
بعدازاں راولپنڈی کی خصوصی عدالت کے جج امجد علی شاہ نے جی ایچ کیو حملہ کیس کی سماعت 2 دسمبر تک ملتوی کر دی اور عمران خان سمیت دیگر پر فرد جرم کی کارروائی چوتھی بار موخر ہو گئی۔
کیس میں عمران خان سمیت 143 سے زائد ملزمان نامزد ہیں جبکہ ذوالفقار بخاری، شہباز گل سمیت 23 ملزمان اشتہاری ہیں، نامزد ملزمان پر بیرون ممالک جانے پر پابندی بھی عائد ہے۔
