غزہ میں اسرائیلی بربریت نہ رکی، صیہونی فورسز کی شیلنگ سے مزید 21 فلسطینی شہید
غزہ: (دنیا نیوز) غزہ میں اسرائیلی بربریت کا سلسلہ نہ رک سکا، صیہونی فورسز کی شیلنگ سے گزشتہ 24 گھنٹوں کے دوران مزید 21 فلسطینی شہید ہو گئے۔
میڈیا رپورٹس کے مطابق اسرائیلی فورسز نے کمال عدوان ہسپتال پر شیلنگ جبکہ نصیرات کیمپ پر بمباری کی جس سے 5 فلسطینی شہید ہو گئے، شہداء میں دو بچے بھی شامل ہیں۔
صیہونی فورسز کی مختلف مقامات پر بمباری سے گزشتہ 24 گھنٹوں کے دوران 21 فلسطینی شہید جبکہ 61 زخمی ہوئے۔
عرب میڈیا کے مطابق غزہ پر اسرائیلی فورسز کے حملوں میں اب تک شہداء کی تعداد 45 ہزار سے تجاوز کر چکی ہے جبکہ ایک لاکھ 7 ہزار 500 سے زائد زخمی ہوئے ہیں۔
دوسری جانب حماس کی جانب سےجاری ایک بیان میں کہا گیا ہے کہ اسلامی جہاد اور پاپولر فرنٹ کے ساتھ جنگ بندی معاہدے پر بات چیت جاری ہے، غزہ میں تمام گروپس جنگ بندی معاہدے کے قریب ہیں، چاہتے ہیں اسرائیل جنگ بندی کیلئے نئی شرائط پیش نہ کرے۔
ادھر یونیسیف کے ترجمان نے کہا ہے کہ غزہ قبرستان میں تبدیل ہو گیا ہے، غزہ کے بچے سردی، بیماری اور صدمے کا شکار ہیں، 96 فیصد خواتین اور بچے غذائی ضروریات سے محروم ہیں۔
