کوئٹہ میں دفعہ 144 نافذ، موٹرسائیکل کی ڈبل سواری پر پابندی عائد
کوئٹہ: (دنیا نیوز) حکومت بلوچستان نے ضلع کوئٹہ میں دفعہ 144 نافذ کر دی۔
حکومت بلوچستان کی جانب سے جاری کردہ اعلامیہ کے مطابق دفعہ 144کے دوران اسلحہ کی نمائش و استعمال پر مکمل پابندی عائد ہو گی، دفعہ 144کے دوران خواتین و بچوں کے علاوہ موٹرسائیکل کی ڈبل سواری پر بھی پابندی عائد ہوگی۔
اعلامیہ کے مطابق گاڑیوں پر سیاہ شیشوں کا استعمال سختی سے منع ہوگا، بغیر رجسٹریشن موٹر سائیکلوں کی نقل و حرکت پر بھی پابندی عائد کی گئی ہے، پانچ سے زائد افراد کے اجتماعات، جلوس، ریلیوں اور دھرنوں پر پابندی عائد ہوگی، عوامی مقامات پر چہرہ چھپانے کے لئے ماسک یا مفلر کے استعمال پر پابندی عائد ہوگی۔
محکمہ داخلہ بلوچستان کے مطابق پولیس، لیویز اور ایف سی کو سخت کارروائی کے اختیارات دے دیئے گئے، خلاف ورزی کرنے پر دفعہ 188 تعزیرات پاکستان کے تحت کارروائی ہوگی، پابندیاں 22 دسمبر 2025 تک مؤثر رہیں گی۔
حکومت کے جاری کردہ اعلامیہ میں ڈپٹی کمشنر کو پابندیوں کی رپورٹ روزانہ محکمہ داخلہ کو ارسال کرنے کی ہدایت کر دی گئی۔
