پبلک ٹرانسپورٹرز کا ہڑتال ختم کرنے کا اعلان، مزدا ٹرانسپورٹرز کا صاف انکار
لاہور: (دنیا نیوز) حکومت سے مذاکرات میں ٹرانسپورٹرز میں دراڑ پیدا ہوگئی، پنجاب حکومت سے مذاکرات کے بعد پبلک ٹرانسپورٹرز نے پہیہ جام ہڑتال ختم کردی۔
وزیر ٹرانسپورٹ بلال اکبر خان سے ملاقات میں مسائل حل کرنے کیلئے ریجن وائز فوکل پرسن مقرر کر دیئے گئے، مزدا ٹرانسپورٹرز نے ہڑتال ختم کرنے سے انکار کر دیا، ٹریفک آرڈیننس کی معطلی کے نوٹیفکیشن تک ہڑتال جاری رکھنے کا اعلان کر دیا۔
دوسری جانب مریم اورنگزیب نے ٹریفک آرڈیننس واپس لینے کی تردید کردی، سینئر وزیر پنجاب کا کہنا ہے ٹریفک آرڈیننس پر عمل درآمد روکنے کا کوئی حکم جاری نہیں ہوا، ایسی قیاس آرائیاں محض جھوٹ ہیں۔
واضح رہے کہ وزیر اعلیٰ مریم نواز نے پھر پنجاب میں ٹریفک قوانین سے متعلق قانون پر مؤثر اور سخت عمل درآمد کا حکم جاری کیا ہے، عمل نہ کرنے والے سے سختی سے نمٹنے کی ہدایت کی ہے، ان کا کہنا تھا کہ عوام اور بچوں کی جان پر سمجھوتہ کیا نہ کریں گے۔
