حکمت عملی تبدیل، پاکستان کا جنوری میں اپنا پہلا پانڈا بانڈ جاری کرنے کا اعلان
اسلام آباد: (دنیا نیوز) وزارت خزانہ نے جنوری میں اپنا پہلا پانڈا بانڈ جاری کرنے کا اعلان کر دیا۔
وزیر خزانہ محمد اورنگزیب کی زیر صدارت جائزہ اجلاس ہوا جس میں انہوں نے اعلان کیا کہ پاکستان جنوری 2026 میں اپنا پہلا پانڈا بانڈ جاری کرے گا جو ایک منصوبہ بند پروگرام کا حصہ ہے جس کی کل مالیت تقریباً ایک ارب ڈالر تک ہو سکتی ہے۔
انہوں نے کہا ہے کہ ملٹی لیٹرل پارٹنرز کی منظوری پہلے ہی حاصل ہو چکی ہے جبکہ چینی ریگولیٹرز سے آخری منظوری جنوری کے اوائل میں متوقع ہے۔
— Ministry of Finance, Government of Pakistan (@Financegovpk) December 19, 2025
وزارت خزانہ کے مطابق اس اقدام کا مقصد فنڈنگ کے ذرائع میں تنوع پیدا کرنا اور چین کی آن شور ڈیٹ مارکیٹ تک رسائی حاصل کرنا ہے، ابتدائی بانڈ سے تقریباً 250 ملین ڈالر کے برابر رقم جمع ہو گی جبکہ مزید اقساط ریگولیٹری منظوریوں کے مکمل ہونے کے بعد جاری کی جائیں گی۔
انہوں نے کہا ہے کہ بانڈ یوآن میں ہو گا اور چین کی مقامی مارکیٹ میں فروخت کیا جائے گا، یہ پروگرام پاکستان کی وسیع تر قرض مینجمنٹ حکمت عملی کا حصہ ہے تاکہ آئی ایم ایف کے 7 ارب ڈالر کے پروگرام کے تحت معیشت مستحکم ہو سکے۔
وزارت کے مطابق چینی ادارہ جاتی سرمایہ کاروں کے ساتھ تعلقات مثبت رہے ہیں جو حالیہ پالیسی اصلاحات کے بعد پاکستان کی میکرو اکنامک صورتحال میں اعتماد کی عکاسی کرتے ہیں۔
