پاکستان اور مصر کے درمیان وزارت داخلہ سطح پر تعاون بڑھانے پر اتفاق
اسلام آباد: (دنیا نیوز) وفاقی وزیر داخلہ محسن نقوی نے کہا کہ مصری وفد کا دورہ دوطرفہ تعاون کی نئی راہیں تلاش کرنے میں معاون ثابت ہوگا۔
وفاقی وزیر داخلہ محسن نقوی اور وزیر مملکت برائے داخلہ طلال چودھری سے میجر جنرل مجدی ہلال کی قیادت میں مصر کی وزارت داخلہ کے وفد کی ملاقات ہوئی، وفد میں بریگیڈیئر عصام ابو الخیر، بریگیڈیئر انجینئر محمد راضی اور بریگیڈیئر ڈاکٹر محمد منیر بھی شامل تھے۔
ملاقات کے دوران دونوں ممالک کی وزارت داخلہ کے درمیان تعاون بڑھانے پر اتفاق کیا گیا، جبکہ سکیورٹی، انسداد دہشتگردی، انسداد منشیات، سائبر کرائم اور سیف سٹی منصوبوں میں اشتراک کو فروغ دینے پر تفصیلی تبادلہ خیال ہوا۔
اس موقع پر نیشنل پولیس اکیڈمی اور مصر کی پولیس اکیڈمی کے درمیان افسران کی مشترکہ تربیت کے لیے تعاون بڑھانے کا بھی فیصلہ کیا گیا۔
وفاقی وزیر داخلہ محسن نقوی نے کہا ہے کہ مصر کے ساتھ تعلقات کو مزید مضبوط بنانے کے لیے عملی اقدامات اٹھائے جائیں گے، جبکہ مشترکہ مفادات کے شعبوں میں تعاون کے نئے مواقع تلاش کرنے کے لیے پاکستانی وفد جلد مصر کا دورہ بھی کرے گا، جبکہ دونوں ممالک کی وزارت داخلہ کے درمیان تعاون کے فروغ سے دوطرفہ تعلقات مزید مستحکم ہوں گے۔
وزیر مملکت طلال چوہدری نے کہا کہ پاکستان اور مصر کے درمیان انسداد دہشتگردی، انسداد منشیات اور داخلی سلامتی کے شعبوں میں تعاون کے وسیع مواقع موجود ہیں۔
مصری وفد نے پاکستان کے مختلف اداروں خصوصاً اینٹی نارکوٹکس فورس اور نیشنل پولیس اکیڈمی کے دوروں کو انتہائی سودمند قرار دیتے ہوئے کہا کہ دونوں ممالک مختلف شعبوں میں ایک دوسرے کے تجربات سے فائدہ اٹھا سکتے ہیں۔
