×

دنیا

ماسکو میں عالمی مذہبی اجتماع، حسین محی الدین قادری پاکستان کی نمائندگی کریں گے

بند کریں

ماسکو: (شاہد گھمن) روس کی مسلم روحانی اسمبلی کی دسویں سالگرہ کے موقع پر ماسکو میں بین الاقوامی علمی و عملی کانفرنس اور خصوصی ثقافتی تقریب کل 28 ستمبر کو منعقد ہوگی، جس میں پاکستان سے پروفیسر ڈاکٹر حسین محی الدین قادری بھی شرکت کریں گے۔

تقریبات میں پاکستان سمیت دنیا کے 40 ممالک کے وفود اور روس کے 60 سے زائد علاقوں کے نمائندوں کی شرکت متوقع ہے۔ یہ پروگرام روس میں منائے جانے والے عوامی اتحاد کے سال، روس کی مسلم روحانی اسمبلی کے قیام کی دسویں اور ماسکو مفتیات کی پندرہویں سالگرہ کے موقع پر منعقد کیے جا رہے ہیں۔

مرکزی پروگرام کے تحت ’’روس کے روایتی مذاہب، اتحاد کے فروغ اور معاشرتی ترقی میں کردار‘‘ کے عنوان سے بین الاقوامی علمی و عملی کانفرنس ماسکو کے پریذیڈنٹ ہوٹل میں منعقد ہوگی۔

کانفرنس میں پروفیسر ڈاکٹر حسین محی الدین قادری پاکستان کی نمائندگی کریں گے اور بین المذاہب مکالمے، روایتی مذہبی اقدار، امن، ہم آہنگی اور مختلف اقوام کے درمیان تعاون سے متعلق پروگراموں میں شریک ہوں گے۔

کانفرنس میں برکس، شنگھائی تعاون تنظیم، آسیان، مشرق وسطیٰ، وسطی ایشیا، افریقہ، یورپ اور براعظم امریکا کے ممالک سے آنے والے وفود شرکت کریں گے۔ روس کے 60 سے زائد وفاقی علاقوں کے نمائندوں کے علاوہ وفاقی قانون ساز و انتظامی اداروں کے سربراہان، علاقائی گورنرز، روایتی مذاہب کے رہنما اور سماجی و عوامی تنظیموں کے نمائندے بھی شریک ہوں گے۔

کانفرنس کا مرکزی اجلاس صبح 10 بجے شروع ہوگا، جبکہ دوپہر 2 بجے مختلف موضوعاتی اجلاس منعقد کیے جائیں گے۔ ریڈ ہال میں ’’امن اور ہم آہنگی کے فروغ میں مذہبی تنظیموں کا بین الاقوامی تعاون‘‘ کے موضوع پر نشست ہوگی، جس میں مذہب، سائنس اور ثقافت سمیت مختلف شعبوں میں اخلاقی اتحاد کے کردار پر تبادلہ خیال کیا جائے گا۔

راؤنڈ ہال میں روس کی مسلم روحانی اسمبلی کی مجلس کا باقاعدہ اجلاس بھی ہوگا۔

روس کی مسلم روحانی اسمبلی کے سربراہ البیر حضرت کرگانوف نے کہا کہ بیرون ملک سے پروگرام میں شرکت کے لیے سامنے آنے والی دلچسپی ظاہر کرتی ہے کہ روس دنیا کے متعدد ممالک کے ساتھ فعال بین الاقوامی مکالمہ جاری رکھے ہوئے ہے۔ ان کے مطابق عوامی سفارت کاری اس مکالمے کو آگے بڑھانے کا ایک مؤثر ذریعہ ہے۔

انہوں نے بتایا کہ 27 ستمبر کو بیرون ملک سے آنے والے مہمانوں کو نیو ماسکو میں بین المذاہب روحانی، تعلیمی اور ثقافتی مرکز کے منصوبے سے متعارف کرایا جائے گا۔ غیر ملکی مہمانوں کو روسی ریاست کے پہلے مفتی محمد جان حسینوف کے نام سے منسوب مستقبل کی ماسکو مرکزی جامع مسجد کے منصوبے کے بارے میں بھی بریفنگ دی جائے گی۔

سالگرہ کی تقریبات کا اختتام اسٹیٹ کریملن پیلس میں ’’ایمان کی طاقت قوموں کے اتحاد میں ہے‘‘ کے عنوان سے خصوصی شام کے انعقاد پر ہوگا۔

ثقافتی پروگرام میں روسی اسلام کی ایک ہزار سالہ تاریخ، روایتی روحانی و اخلاقی اقدار، تعلیم، وطن کی خدمت، ثقافتی ورثے اور روس میں آباد مختلف اقوام کے اتحاد کو اجاگر کیا جائے گا۔ پروگرام میں معروف فنکار اور گلوکار شرکت کریں گے، جبکہ مہمانوں کے لیے ’’مشرق سے روشنی‘‘ کے عنوان سے آل رشین نمائش بھی منعقد کی جائے گی۔

نمائش میں وولگا بلغاریہ میں اسلام قبول کیے جانے کی تاریخ، روسی مسلمانوں کی روایات، قومی ہیروز اور رضاکاروں سے متعلق فن پارے اور تصاویر پیش کی جائیں گی۔

روس کی مسلم روحانی اسمبلی کے مطابق یہ سالگرہ تقریب روحانی ورثے، بین المذاہب مکالمے اور روس کی مختلف اقوام کے اتحاد کے لیے منعقد کیے جانے والے وسیع بین الاقوامی پروگرام کا اختتامی حصہ ہوگی۔