یوٹیوب کا تخلیق کاروں کے لیے تھمب نیل فیچر متعارف کرانے کا اعلان
کیلیفورنیا:(دنیا نیوز) ویڈیو سٹریمنگ پلیٹ فارم یوٹیوب آئندہ چند ہفتوں میں اپنے تمام چینلز کے لیے نیا ’تھمب نیل ٹیسٹ اینڈ کمپیئر‘ فیچر متعارف کرانے جا رہا ہے۔
اس فیچر کو استعمال کرتے ہوئے تخلیق کار اپنی کسی بھی ویڈیو میں تین مختلف تھمب نیل استعمال کر سکیں گے، جس سے یہ معلوم کیا جا سکے گا کہ کس تھمب نیل نے بہترین کارکردگی دکھائی، ’تھمب نیل ٹیسٹ اینڈ کمپیئر‘ فیچر تخلیق کاروں کو نئی ویڈیو پوسٹ کرتے وقت متعدد تھمب نیل اپ لوڈ کرنے کا آپشن پیش کرے گا۔
آزمائش کے دوران یوٹیوب مختلف ناظرین کو مختلف تھمب نیل دِکھائے گا جو بعد ازاں مناسب مقدار میں ڈیٹا اکٹھا ہونے کے بعد (جس کے لیے اندازاً دو ہفتوں کا وقت درکار ہوگا) یوٹیوب اس بات کا تجزیہ کرے گا کہ کس تھمب نیل کا سب سے زیادہ واچ ٹائم شیئر ہوتا رہا۔
ڈیٹا کی بنیاد پراپ لوڈ تھمب نیل کے لیے تین میں سے کوئی ایک نتیجہ قرار دیا جائے گا، پہلے کا نام ’ونر‘ جو واضح طور پر فاتح تھمب نیل اور واچ ٹائم کے اعتبار سے سب کو پیچھے چھوڑ دے گا، دوسرا ’پریفرڈ‘ تھمب نیل جس نے دیگر سے بہتر کارکردگی دکھائی ہوگی لیکن اعداد و شمار کے اعتبار سے نتائج کم حتمی ہوں گے اورتیسرا ’نن‘ جس میں کسی بھی تھمب نیل کو فاتح قرار نہیں دیا جائے گا۔
