ای وی ایم پر تنقید: ایلون مسک اور سابق بھارتی وزیر راجیو چندر کے درمیان سرد جنگ
نیو یارک :(ویب ڈیسک) ٹیسلا اور سوشل میڈیا پلیٹ فارم ایکس کے مالک ایلون مسک اور بھارت کے سابق مرکزی وزیر راجیو چندر شیکھر کے سرد’جنگ‘ شدت اختیار کرتی جارہی ہے، ایلون مسک نے دو دن بھارتی انتخابات میں الیکٹرک ووٹنگ مشین (ای وی ایم) کے استعمال پر تنقید کی تھی۔
ایلون مسک کا کہنا تھا کہ انتخابی عمل میں ای وی ایم پر بھروسہ نہیں کیا جاسکتا کیونکہ کوئی بھی پروگرام تھوڑی سی توجہ سے کسی بھی ای وی ایم کو ہیک کرسکتا ہے، اس پر راجیو چندر شیکھر نے کہا تھا کہ بھارت کی ای وی ایمز کسٹمائزڈ ہیں اور وہ انٹرنیٹ وغیرہ سے منسلک بھی نہیں اس لیے کوئی بھی ہیکر اُن تک نہیں پہنچ سکتا۔
ایلون مسک کا استدلال تھا کہ کوئی ہیکر کسی ای وی ایم کو ہیک کرکے انتخابی نتائج الٹ پلٹ سکتا ہے، اس سے سیاسی عمل میں بہت سی خرابیاں پیدا ہوسکتی ہیں۔
راجیو چندر شیکھر نے جواب میں ایلون پر براہ راست وار کرتے ہوئے کہا کہ بھارت نے اس بات کا پورا اہتمام کیا ہے کہ ای وی ایم سے کسی بھی طرح کا کِھلواڑ نہ کیا جاسکے،اگر بھارتی الیکشن میں استعمال ہونے والی ای وی ایمز کو ہیک کیا جاسکتا ہے تو پھر کسی بھی ٹیسلا کار کو بھی ہیک کیا جاسکتا ہے۔
ایک بیان میں انہوں نے مزید کہا کہ ہم ٹیکنالوجی کے دور میں جی رہے ہیں، اب کوئی بھی چیز مکمل طور پر محفوظ قرار نہیں دی جاسکتی، کیلکیولیٹر اور الیکٹرانک ٹوسٹر کی مثال دیتے ہوئے کہا تھا کہ اُنہیں ہیک نہیں کیا جاسکتا کیونکہ وہ مصنوعی ذہانت بہت کمتر درجے کی استعمال کرتے ہیں، ای وی ایم کا بھی یہی معاملہ ہے، یہ مشین صرف ووٹ گنتی اور پوری گنتی کو محفوظ رکھتی ہے۔
